Çalakwanê Strasbourgî veng da dewleta Almane:Sey Wîlly Brandtî bê

Xoverdayoxanê Strasbourgî serekwezîra Almane, serekkomar û Wezîrê Karanê Teberî rê mektûb şirawit û seba qedînayîşê tecrîdî veng da ke tê bigêrê.

Serê nameyê çalakwananê grevê vêşanîye ya Strasbourgî de hemserekê KCDK-E Yuksel Koçî serekkomarê Almanya Franz-Walter Steînmeîr, serekwezîre Angela Merkele û Wezîrê Karanê Teberî Heîko Mass’î rê yew mektûb şirawit û vat ke seba demokrasî, aşitî û azadîyan ê Tirkîya Almanya wayîrê hêzêkê pîlî ya.

Yuksel Koçî ard ziwan ke sey hemserekê KCDK-E ke Ewropa de 457 sazî û komelî binê sîwanê ci de yê û serê nameyê 14 çalakwanan mektûbî nûseno û bi vîr ard ke çalakwanan ra 5 kesî Almanya de ciwîyenê. Mektûb de ame vîrardene ke 7 serrî yo avûkat û 3 serrî yo zî keyeyê ci nêeşkeno Ocalanî bivîno û ame vatene ke binpaykerdişêko cidî yê heqanê merdiman yeno ciwîyayene.

 ‘BI TECRÎDÎ ZEXT Û QIRKERDIŞÎ VÊŞÎ BÎYÎ’

Mektûb de ame vatene, 6’ê Nîsan a 2015’î ran ata Ocalanî dir pêvînayîş ameyo birnayene û dima ra temsîlkarê demokratîkî yê şarî ameyê hedefgirewtene, şaredarîyî ameyê hepiskerdene, bi hezaran kesî erzîyayê zîndanan û sere de Rojawan û Kurdistan de hêrişê îşxalî û qirkerdişî vêşî bîyê.

Mektûb de ame eşkerakerdene ke bi tecrîdî sere de hemverê Kurdan hemverê muxalîfan de polîtîkayê zext û şerî ameyê destpêkerdene û qalê serkewtişê projeyê HDP’yî yê Tirkîya û projeyê şaran ê Rojawanî ke wextêkê nizdî de ameyo awankerdene ame kerdene. Mektûb de ame vatene gama ke umîdê demokrasî aver şîyêne Erdoganî peynîya prosesê muzakereyî yê bi Ocalanî arde û Tirkîya açarîya bi zîndanêkê akerdeyî; Rojawan de zî bi rayîrê çeteyanê El Nûsra û DAÎŞ’î polîtîkayê şerî kewtî dewre. 

Mektûb de ame vatene 14 endamê Însîyatîfê Azadîya Ocalanî ke mîyanê înan de parlamenter, rojnameger, huqûqnas, akademîsyen, avûkatê heqanê merdiman û aktîvîstî estê grevê vêşanîye  Strasbourgî domnenê û hayîdarîya xoverdayîşo ke hetê Leyla Guvene ra ameyo destpêkerdene ewro xeylî welatan de û bi seyan tepişteyanê zîndanan dewam keno amî parekerdene.  

 ‘SEREKWEZÎRÊKO BÊTERS Ê SEY WÎLLY BRANDTÎ LAZIM O’

Mektûb de têkilîyê sîyasî û îqtîsadî yê Tirkîya û Almanya ameyî bi vîrfînayene, xusûsen bale ancîyaye serê rolê hukmatê Almanî yê tesdîqkerdişê pêşnameyê Konseya Ewropa yê 22’ê Çele yê eleqedarê Tirkîya. Serekwezîra Almane Angela Merkel era ame waştene polîtîkayêka bêterse ya sey serekwezîrê verênî Wîlly Brandtî ke serranê 1970’an de Polîtîkaya Rojakewtene vistebî dewre û vernîya abîdeyê Qirkerdişê Cihûyan de çok rona û uzrê xo waşt bişopnê.

Mektûbo ke 13’ê Sibate de ameyo nuştene de ame vatene ke çalakîya grevê vêşanîye roja 59’ine de yo û halê weşîye yê 7 çalakwanan prosesêkê biqesawetî de yo. Mektûb de ame vatene ke 5 çalakwanî Almanya de ronişenê û weşîya nê çalakwanan ra hukmato Alman mesuldar o û bi nê amacî hukmatê Almanî rê veng ame dayene ke hendî tê bigêro.