Semedê wedarnayîşê tecrîdê serê rayberê şarê Kurdî Ocalanî û paştdayîşê grevê hemsereka KCDyî û wekîla HDPyî Leyla Guvene her cayê Ewropa de Kurdistanijî dest bi grevê veşanîyê kenî.

Bajarê Bernî yê Swîsre de na 3 roj a ke grevê veşanîye dewam keno û çalakwanan ANFyî  rê nê ser o qisey kerd. Çalakwanan vat: ''O çîyêko ke wazîyeno Kurdî bê Ocalanî bicuyî la ma cuyêka bê Ocalanî qebul nêkenî.''

Kurdanê Kirgizîstanî ra Xezal Mamedova vat: ''Ma semedê wedarnayîşê tecrîdî yo ke Ocalanî serde yo û semedê paştdayîşê çalakîya Leyla Guvene ameyî pêser. Ma, Kurdê Kirgizistanî lanet anî o tecrîdo ke Ocalanî ser de yo. Heta peynî ma bi rayberê xo yî. Yew cinîya Kurde ser çi ferz o, çi para mi bikewo ez do heme bîyarî ca. Ez tîya ra hevalanê xo yê ke zindananê Tirkîya û Kurdîstanî de verxodanê silam kena.''

'GANÎ VENGÊ KURDAN BÊRO BERZKERDENE'

Çalakwanê grevê veşanîye Mehmet Taşî vat: ''Îmralî de sucê merdimatî yeno ca la CPT bi qeraranê xo mojneno ma ke qerarê înan zî polîtîk o. Ma, ê Kurdistanijê ke Ewropa de cuyenî, ne tecrîdê serê Rayberê xo ver ne zî bêvengmendişê CPTyî ver eşkayî bêveng bimanî. Semedê înan zî ma paye ra yî.''

'WAŞTIŞÊ GUVENE WAŞTIŞÊ MA PÊRUNAN O'

Çalakwanan ra Mehmet Durgac zî  wina va: '' Waştişê Guvene waştişê ma pêrunan o. Ez ameya tîya ke paşt bidî çalakîya Leyla Guvene. Ez bawer a ke Kurdî sere wedarê, do dişmenê ma zî tepîya game bierzo.''