Semedê persayîşê aqibetê vîndîbîyayan û cezakerdişê qetilkeran çalakîyê cigêrayîşê edeletî sey her hewteyî ewro zî xeylî bajaran de ameyî viraştene.

AMED

Amed de çalakîya roniştişî ya cigêrayîşê edeletî reya 526’ine  bi sloganê,‘‘Wa vîndîbîyayeyî bêrî vînayene, kiştoxî bêrî cezakerdene‘ banê Komela Heqanê Merdiman (ÎHD) de ameye viraştene. No hewte aqibetê Mehmet Mûngan o ke tewr peynî de serra 1998’î de qezaya Silopî ya Şirnexî de ameyo vînayene, ame persayene. Çalakîye de xoverdayîşê Guvene zî ame silamkerdene.

ÊLÎH

Êlîh de zî bu heman waştişî pawitoxê heqanê merdiman û merdimê vîndîbîyayan  reya 432’ine banê ÎHD’yî de ameyî têhet. Çalakîye de aqibetê  Îbrahîm Çelîk û lajê ci Edîp Çelîk ê ke serra 1994’î de dewa Zorava ya Êlîhî de ameyî destbendkerdene û reyna înan ra xebere nêameya girewtene, ame persayene.

ÎZMÎR

Îzmîr de zî banê ÎHD’yî de çalakîya ‘‘Wa vîndîbîyayeyî bêrî vînayene, kiştoxî bêrî cezakerdene‘‘ reya 472’ine ameye viraştene. Çalakîye de bi wesîleya 8’ê Adare Roja Cînîyan a Mîyanneteweyîye aqibetê cinîyan ê vîndîbîyayan ame persayene.

STENBOL

Stenbol de zî Mayê Şemeyî sey hewteyî no hewte zî kuçeyan de bî. Çalakîye de bi wesîleya 8’ê Adare Roja Cînîyan a Mîyanneteweyîye aqibetê cinîyan ê ke binê nêzaretî de ameyî vînkerdene ame persayene.