Serdana Wezîrê Karanê Teberî yo Tirk Çavûşoglûyî ya Iraqî roja Yewşemeyî dest pêkerde û do di rojan dewam bikero. Çavûşoglû sere de hemmeslekê xo Muhammed el Hakîmî reyde ronişt û kombîyayîşê çapemenîye viraşt.

Rejîmo Tirk rayberîya Bexdayî ra wazeno ke bicaardişanê xo yê hemverê PKK’yî zêde bikero û artêşa Tirkî dir hîna zaf hemkarîye bikero.

Halo nikayên de xeylî baregehê rejîmê Erdoganî Başûrê Kurdistanî de estê. Tayê herêmî zî ameyê îşxalkerdene.

Şengalo ke çeteyanê DAÎŞ’î serra 2014 de hêrişê qirkerdişî ser o kerdîbî, hedefê dewleta Tirkî de yo. Rejîmê Erdoganî xeylî reyan PKK’yî seba xo sey bahane ramot û gef wend ke Şengalî îşxal bikero û xeylî reyan hêrişê Şengalî kerd.

Hukmatanê Iraqî û Başûrê Kurdistanî heta nika hemverê hêrişanê rejîmê Enqere de razînêbîyayîşêko cidî nêmot ra.

Yeno pawitene Çavûşoglû Hewlêr de îdarekaranê PDK’yî yê ke embazê ê yê dir ronişo.

Yeno vatene, Çavûşoglû do serdana xo ya di rojan de bi serekkomarê Iraqî Berhem Salih, serekwezîrê Iraqî Adil Abdulmehdî, serekwezîrê herêma Kurdistanî Nêçîrvan Barzanî û hetkaranê ê û serekê Konseya Ewlekarîye ya Herêma Kurdistanî dir pêvînayîşê virazo.

Do wezîrê Karanê Teberî yo Tirk Bexda û Hewlêr de temsîlkaranê komanê Tirkmenan dir zî ronişo.