Dimayo ke grevê vêşanîye yê hepisxaneyan qedîya, zêdebîyayîşê binpankerdişê heqanê merdiman ê serê tedawîya tepişteyan kewte rojdem. Xeylî tepişteyê ke rewşa înan a weşîye giran a erey ameyî berdene bi nêweşxane, înan ra tayê zî seba ke mûayenekerdişo bi keleçeyan qebûl nêkerdo bê tedawîkerdiş apey ameyê şawitene bi hepisxaneyan. Raybera Komela Heqanê Merdiman (ÎHD) Nûray Çevîrmene binpankerdişê heqanê merdiman ê vera tepişteyan ercnayî.

Çevîrmene ard vîrî, bi hezaran tepişteyî kewtî grevê vêşanîye û dimayo ke grev qedîya nêweşxane û hepisxaneyî bi hawayêko baş nêzdîye na babete nêbîyî. Çevîrmene ard ziwan, xeylî tepişteyî bi hawayêko kelepçekerde ameyê berdene bi nêweşxaneyan û vat, rewşa weşîye ya tepişteyan ê ke demêko derg grevê vêşanîye de mendê baş nîya.   

Çevîrmene vat, bê tedawîkerdiş apey berdişê çalakgeran averde do bibo sebebê problemanê girdan û vat, “Ma ÎHD, destpêkê grevê vêşanîye ra nata serê binpankerdişê heqanê merdiman de  temaşekerdişê xo raporan de eşkera kerdî. Dimayo ke grevê vêşanîye qedîya, ma seba tespîtkerdişê binpankerdişê heqanê merdiman xebetîyayî. Seba bicaardişê heqê tedawîkerdişî Yewîya Tabîbanê Tirkî (TTB) de xebatî dewam kenê û ma zî mîyanê koordînasyonî de pîya xebitîyenê. Ma masayêka krîzî awan kerde ke huqûqnasî, kerdkarê weşîye û avûkatê heqanê merdiman zî mîyan de estê. Ma bi nê rayîrî mudaxeleyê ke hewca kenê ma do bikerê.”