Kurdîstan û Tirkîya de varyantê Delta yê janê Korona çend şino vila beno.  Seba ke derzîna janî kêm ameye kerdene hûmara nêweşan zêdîyena.

Çewlîg bajaranê ke nêweşê Korona tede tewr zafê de rêza hîrêne de yo. Goreyê donayanê Wezîrîya Weşîye  hewte de hezar û 256 kesî janî geno. Bajar de derzîna diyene dayo xo ro pêro pîya humara înan se de 33 yo.

Dîya zanayene ke ca ca de stantî ameyî ronayene la raştîye de derheqê derzîna janî de zanayîşo raşt nêno dayene.

Nêweşxaneyê Dewlete yê Çewlîgo ke 5 kat o de 2 katan de nêweşê Korona ameyî cakerdene. Serwisê ciewnîyayîşê giranî zî se de 80î ya cor dekerdîya. Yew aşma ke hûmaya nêwaşan bilez zêdîyena.

Endamê Sendîkayê Kedkaranê Xizmetê Sosyal û Weşîye (SES) ê Çewlîgî Ramazan Nazilerî ard ziwan ke jan Çewlîg de zêdîyayo ke zafê ci varyantê Delta yo. Nazilerî vat:  ''Seba ke hemwelatîyî derzîne nêdanê xo ro jan vila beno. Şar tedbîranê hewcekerdeyan nêgeno. Sebebê nayî zî oyo ke dezgehê selahîyetdarî tedbîranê qîmkerdeyan nêgenê.''

Nazlierî bale ante ser  ke bajar de zaf tay kesan derzîna janî daya xo ro û vat: ''Semedê muhîmîya derzîne zanayîş nêno dayene. Dezgehê selahîyetdarî wina yew xebate nêkenê. Merdimî cehd kenê ke medyaya sosyale ra derheqê derzîne de zanayîş bigîrê. Tîya zî tay hesaban de derheqê derzîna janî de eşkerayîye bêfeyde yenê kerdene. Coka hemwelatîye zî xo peyser ancenê, nêwazenê derzîne bidê xo ro.''

Nazilerî ard ziwan ke derzîna vera janî dinya de ameya qebulkerdene û veng da ke wa her kes derzîne bidê xo ro.