DEM Partî mabênê 25-26ê gulana 2025î de bi şîarê ‘’Îdareyanê Herêmîyan ê Demokratîkan Reyde ver bi Komelê Demokratîkî’’ kombîyayîşêk kerdibi. Netîcenameyê kombîyayîşî ame eşkerakerdene.

Netîcename de ame vîrvistene ke weçînayîşanê 31ê adare ra dima 10 şaredarîyan rê qeyûmî ameyê tayînkerdene û no zî tengbîyayîşê îqtîdarî eşkera keno. Netîcename de wina ame vatene: ‘’Şert û mercî se benê wa bibê ma do îradeyê şarî bipawê û apey şaredarîyanê xo bigêrê. Ma do her hêrişê vera sîstemê Hemserekîye vindarnê. Sey DEM Partî ma do goreyê mîrasê şaredarîya komelpereste xebatanê xo rê dewam bikerê û şaredarîyan bi şefafî, bi beşdarîya şarî îdare bikerê.

Seba qedînayîşê dej û wêranîye 27ê sibate de Birêz Abdullah Ocalanî mesuldarîyêka tarîxîye girewte xo ser û veng da. Verê ney de ganî prosesê demokratîkbîyayîşê Tirkîya bi lezî biqedo. Aktorê serekeyî yê ke nê prosesî de netîceyan virazê îqtîdar û dewlete yê.

Ma awankerdişê îdareyanê herêmîyan ê demokratîkan seba Tirkîyayêka demokratîke girîng vînenê. Na çarçewe de:

⦁ Ganî qeyûmê ke ameyê tayînkerdene apey bêrê erşawitene û weçînitoxî abigêrê erkanê xo ser.  

⦁ Ganî madeyê eleqedarî yê Qanûnê Şaredarîyan ê 5393yî bêrê wedaritene û tayînkerdişê qeyûman biqedo.

⦁ Ganî pênaseyê Hemserekîye yê Qanûnê Partîyanê Sîyasîyan qanûnê şaredarîyan de zî bêro dîyarkerdene.

⦁ Ganî wesayeto îdarî û ekonomîk ê îdareyê merkezî yê vera îdareyanê herêmîyan wedarîyo.

⦁ Ganî demokrasîya temsîlkarîye ra zafêr şar raşta raşte tewrê prosesanê demokrasîyî bibo.

⦁  Ganî şerhê Tirkîya yê serê Şertê Xoserîye yê Peymana Îdareyê Herêmîyî ya Ewropa bêro wedaritene.

Ma ancî perwerîya xo seba paradîgmaya cuya hempare ya Birêz Ocalanî anê ziwanî. Ma soz danê ke do mesuldarîyanê xo bîyarê ca.’’