Merkezê Kongre yê Amedî de Konferansê Wekîlan ê Cinîyan ê Kurdan o Yewin yeno kerdene. Konferanso ke bi şîarê ‘’Ma sîyasetî demokratîk bikerê, komelê demokratîkî înşa bikerê’ yeno kerdene  Kurdîstan, Ewropa û Rojhelatê Mîyanênî ra xeylê wekîlê cinîyî yê kurdî tewrê ci bîyî. Konferansî bi hîrê roniştişan roja verene xo dima verdaye.

Gultane Kişanak qiseykerdişê xo de vat: "Ma cinîyî  çareserîye zî tede gerek pêro pîya xebatêke rayra bere. Yewîya neteweyîye xerco esasî yê nê prosese çareserîye yo. "

Semra Guzele zîndanî ra mesajêk şawit û vat: "Prosesanê haştîye de rolo gird  ê cinîyan o. 
Cinîyî hûnca do mîsyonê xo yê tarîxîyî bîyarê ca  komelbîyayîşî bîyarê ca û haştîye înşa bikerê."

Hemsereka  Meclîsê Îdareyê Xoserî yê Rojawanî Avîne Swêda ke bi rayîrê Zoomî tewrê konferansî bîyî nê wina vat: "Ma sey cinîyan ê Rojawanî mesajê Birêz Ocalanî esas gene. O pêro şer û pêkewtişanê Rojhelatê Mîyanênî rê çareserîye teqdîm keno. Gerek cinîyî projeye haştîye û komelê demokratîke rê serkêşîye bikerî. "

Wekîla verene Leyla Zana zî nê vatî: " Cinîyê mîyanê çar dêsan de bî. Nika ma vînenê dinya rê benê nimûne. Cinîyê dinya cinîyê kurdan nimûne gene. Cinîyê kurdan tarîxî ra vengê xo kenê berz la raya verên a ke wina rêxistinkerde têkoşîn kenê. Cinîyê gerek pê xo bawer bê, hêzdar bê û nê bimojnê komelî. "

Endamê Îdareyê Yewîya Parlamentoyan a Başûrê Kurdîstanî Semira Goran zî bale ante muhîmîya yewîye ser.

Parlamentoyê Iraqî ra Kurda Emer zî bale ante xoverdayîşê cinîyan ê kurdan ser û vat ma sey cinîyan kede û bedelê girdî dayî û hata nê rojan ameyî.

Endama Yewîya Parlamentoyanê Kurdîstanî ra Kurdîstan Pirdawid zî ard ziwan ke gerek cinîyê Başûrê Kurdîstanî rolê muhîmî kay bikerî ke bieşkê wayîrê heqanê xo bivejîyê. "

Aktîvîsta TJA Çaglare Demirel vateyê "Heta ke cinîye azad mebo, komel nêeşkeno bibo azad " yê Rayber Apoyî vist vîrî û vat no felsefe bingeyê têkoşînê înan o.

Endama Partîya Sosyalîste ya verene Nesrîne Muhammed Salîh zî qala tecrubeyanê xo kerde û vat: "Haştîye û azadîye têna bi tewrbîyayîşê aktîfî yê cinîyan mumkun o."

Tewrbîyayoxa bîne Necîbê Latîf zî bale ante vengdayîşê Rayber Apoyî ser û vat cinîyê kurdan hem siyaset de hem zî têkoşînê komelkî de rolo aktîf girewt xo ser.

Bade qiseykerdişan bi beşê pers-cewaban roja verên a konferansî qedîyaye. Roja diyîne de do xebatê atolye bêrê kerdene.