Çewlîg de semedê Newroza sibayî pêro hazirîye qedîyayî. Komîteya Newroze ra Şevket Kalindarî veng da ke wa şarê Çewlîgî siba dormeyê adirê Newroze de bêro têhet.

Emser Roşanê Newroze bi şîarê  “Rabe dema azadî û serkeftine ye” yeno pîrozkerdene. Newroza Çewlîgî 20ê adare (siba) do bêro pîrozkerdene. Şayîyê Newroze roja çarşemeyî  serê rayîrê Nêweşxaneyî yê Mehleya Sarayî de do saete 11.00 de bêro destpêkerdene.

Wekîlê DEM Partî yê Çewlîgî Omer Faruk Hulaku û namzedê şaredarî yê DEM Partî yê Çewlîgî Çîçek Ariç û Aydin Burçun do tewrê şayîye bibê. Hunermendî Ciwan Adar û Biro Aris zî do bi deyîranê xo reng bidê şayîya Newroze.

Komîteya Newroze ra Şevket Kalindarî ard ziwan ke hazirîyê înan qedîyayî û semedê tewrbîyayîşê şayîya Newroze veng da şarê Çewlîgî. Kalindarî bale ante muhîmîya hemleya 'Abdullah Ocalanî rê azadîye meseleya kurdan rê çareserîya sîyasîye' ser û vat ''Ma zî wazenê bibê leteyêkê na hemla. Coka ma veng danê şarê xo ke wa tewrê Newroze bibo.''

Kalindarî vat ê do siba Çewlîg de adirê Newroze tafînê û germayîya nê adirî bikirişê Amedî zî.