Emser bi mîlyonan bi waştişê azadîya Rayberê Şarê Kurdî Abdullah Ocalanî Newroze fîraz kenê.

Qezaya Kanîreşî ya Çewlîgî de badê 12 serran ewro Newroze ameye fîrazkerdene. Şarê Kanîreşî seatanê serê sibayî ra verê xo da warê Newroze. Wekîla DEM Partî ya Mêrdînî Salîha Aydenîz û Wekîlê Çewlîgî Omer Faruk Hulaku, namzedê şaredarîyê yê Çewlîgî Çîçek Ariç û Aydin Burçun, namzedê şaredarî yê Kanîreşî Zuhre Eroglu û Mehmet Genç tewrê şayîye bîyî.

Newroze bi rêzgiretişê semedê şehîdanê têkoşînê azadîye dest pê kerd û dima adirê Newroze bi coşê pîlî û slogananê ''Bijî Serok Apo'' ame tavistene.

Namzeda şaredarî ya DEM Partî ya Kanîreşî Zuhre Eroguluya ke verî qisey kerd şarê Kanîreşî sey şarê xoverdayoxî name kerd û vat, ''Ma do pêro pîya çîyo ke yê ma yo peyser bigêrê. Ma do pîya şaredarî îdare bikerê. 31ê adare de ma do tîya govende bîgêrê. Dem demê Kanîreşî yo.''

Wekîlê Çewlîgî Omer Faruk Hulakuyî zî mesajê Rayberê Şarê Kurdî Abdullah Ocalanî yo ke Newroza 2013yî de Amed de ame wendene, wend.

Wekîla Mêrdînî Salîha Aydenî qiseykerdişê xo de nê vatî: ''Ewro şima binê na vewre de reyna îradeyê xo ramojna û no war kerd de. Êyê ke vanê 'ma îradeyê kurdan şikit' wa rinda biewnê nê warî ra. Newroze pîya bi serewedaritiş û xoverdayîşî îradeyê cuyeya. Coka ma vanê ma do adirê Newroze heta peynî gir bikerê.

Ma vanê ke, embazê ma yê ke semedê azadîye têkoşîn kerd ê nê, înanê ke ê eştê zîndanan ê terorsît ê. Êyê ke ziwan û kulturê kurdan nas nêkenê, şaredarîyanê ma de qeyûm ca kenê ê terorîst ê. Heta ke şarê kurdî azad mebo, şarê tirkî zî nêeşkeno bibo azad. Ne semedî ra ma semedê azadîya xo perûne têkoşîn kenê. Seba ke dewleta tirke demokratîk nîya, meseleya kurdan her roje xorîyêre bena.

Çareserîya demokratîke ya meseleya kurdan de têna Birêz Abdullah Ocalan muxatap o.  Birêz Ocalan seba ke semedê haştîye û demokrasîyî têkoşîn kerd ewro binê tecrîdê giranî de yo.  Ewro tecrîd her ca de yo. Coka heta qedîyayîşê nê tecrîdî ganî ma têkoşînê xo xurtêr bikerê. Kenê ke tecrîdî bikerê tewirêkê îdarekerdişî. Bi nê tecrîdî kenê ke şerî zafêr bikerê.  Cehd kenê ke kurdan bêstatu biverdê.  Bi nê tecrîdî kenê ke polîtîkaya qeyûmî aver bêrê.  Ma zî vanê ke; ma do heta azadbîyayîşê Birêz Abdullah Ocalanî têkoşînê xo bidomnê.''