Wekîlê  Partîya Çep a Keske yê Wanî Sînan Çîftyurekî ard ziwan ke tecrîdê vera Rayberê Şarê Kurdî Abdullah Ocalanî ganî biqedo. Çîftyurekî derheqê babete de ANFyî rê qisey kerd.

Çîftyurekî da zanayene ke heqo qanûnî yo ke Abdullah Ocalan bieşko keye û avûkatanê xo bivîno la destûr nêdîyeno ci. Çîftyurekî dîyar kerd ke Ocalan tecrîdkerde yo la hukmat hewce nêvîneno ke derheqê babete de eşkerayîye bido. Sînan Çîftyurekî vist vîrî ke çend mengan vera 'cezaya dîsîplînî' dîyena Rayberê Şarê Kurdî û ard ziwan ke no raşt nîyo. Çîftyurekî vat: ''Eke mîyanê tecrîdî de tecrîd est o dewlete mecbûr a ke keye û avûkatan rê qala ney bikera la naye ser o eşkerayîye zî nêdana.''

Çîftyurekî persê 'Hukmat çita wazeno, çira tecrîdî de israr keno?' ser o vat: ''Hukmat tecrîdî sey hacetê tengkerdişê komelî şuxilneno. Hukmat keye û avûkatan zî bi nê hawayî mexdûr keno ke wa fikrê Ocalanî nêzanê. Ganî Ocalan bieşko sîyasetê teberî teqîb bikero. No tecrîd pêro rayaumûmîye eleqedar keno. Ganî no tecrîdo neheq cade biqedo. Wezîrê Edaletî zî ganî sebebê tecrîdî rayaumûmîye rê eşkera bikero. Heqê Ocalanî est o ke bieşko keye û avûkatanê xo bivîno. Coka ma venga Wezîrîya Edaletî danê ke babete ser o eşkerayîye bida.''