Kongreya Pîle ya 5. ya HDPyî bi şîarê 'Çareserî ma de ya', bi beşdarîya bi des hezaran kesan Anqara de ameye kerdene. Beşdaranê kongre ANFyî rê qisey kerd. 

Yagmure Kavak: Seba kongreya HDPyî bi hezaran kesî Anqara de kom bîyî. Salone de coşêko pîl est o. Vera zulm û zorbazîya AKP-MHPyî yê serê HDPyî, vera dewaya qefilnayîşî, vera tayînê qeyûman, vera kiştoxanê Denîze Poyraz ma ewro tîya de kom bîyî. Tîya de qala 'Rayîrê Hîrêyînî' yena kerdene. 

Alî Ozoglu: Fatsa ra tewra kongre bîya. Ma bi horon, bi tulum bi coşêkê pîlî ameyî tîya. Êyê ke vanê 'Ma do HDPyî biqefilnê' wa biewnê na kongre ra û eqlê xo bigêrê xo ser. HDP şar o. Çew nêeşkeno na partîye bêveng bikero. Kokê nê partîye resenê Mazlûm Dogan, Kemal Pîr û Hakî Kareran.

Delegeya HDPyî Songule Şarkli: Rixmê hêrişan zî beşdarîyêka xurte est a. Destpêkî ra heta peynî ma do HDPyî bipawê. Xoverdayîşê ma do dewam bikero. HDP û tradîsyono sîyasî yê HDPyî bêçare nîyo. Çareserîyê ma yê alternatîfî qetî est ê. Ma do heta peynî partîya xo bipawê.

Delegeya HDPyî Medîha Yuksel: Bi dekerdişê na salone, bi geşkerdişê coşî ma mesaj danê hêrişanê serê HDPyî: 'Ma tîya de yê, payan ser de yê, qetî nêşorê.' Ma bi nê hêzî do vera faşîzmê AKP-MHPyî têkoşîn bikerê.

Delegeyê HDPyî Bulent Uyguner: Rixmê dewaya qefilnayîşî û tedayan zî HDPyî na kongre de reyna mojna ke est o û hêzêko komelkî yo. Nika salone dekerde ya. HDPyî reyna mojna hêzanê herêmîyan û mîyanneteweyîyan ke îradeyê çareserîye yo û şar HDPyî reyde yo.