Yusuf Îba rixmê rewşa weşîya xo ya xirabe zî 107 rojî yo bi qerardarîye grevê vêşanîye de yo. Paştdayîşê seba Îbayî roje bi roje zêde benê.

Afrîka, Rûsya, Îran, Kore, Swîsre û Îngilîstan ra aktîvîstî bi rayîrê peyamanê bi dîmenan paştdayîşê xo yê seba grevê vêşanîye ramojna.

Aktîvîstêka Îranije: Merhaba Yusufcan, ez dayîkêka Îranij a ke 2 domanî ma estê. Hevalê min ê Kurdî yê ke Tirkîya ra yê mi rê qalê rewşa to kerd. Ez zana ke seba to wezîfeyêkê xeylî muhîm o û xebatêkê xeylî bizehmet o. Bi nameyê merdimîye, bi nameyê şarê Kurdî ti xebatêko muhîm kenî. Bizane ke ma zaf to ra hes kenê; seba ke grevê to seba heme merdimîye yo. Ez pê paştrasta ke wextêkê xeylî kilmî de ma do Kurd û Kurdistano azad pîroz bikerê. Ma bi to sereberz ê. Serkewtişî.

Aktîvîsta Rûse: No dîmen seba Yusuf Îbayî, nameyê mi Yana ya. Ez na çalakîya to zerrî û can ra pîroz kena ke seba bedilîyayîşê sîstemê xirabinî virazena. Ti hemwelatij û birayêkî baş î. Hêvî kena çalakîya xo de ti do ser bikewî û wayîrê weşîyêka başe bibe.

Efrîka ra aktîvîstêk: Ti zaf biciwîye Yusuf Îba. Serkewtişî.

Aktîvîstêka Brîtanyanije: Ez wazena bi Îngîlîzkî  hîsanê xo bîyara ziwan. Mi hîkayeya to heşnaye. Ti prosesêkê zaf bizehmetî ra derbaz benî, la eynî wext de ti xeylî xurt î. Ez to fam kena. Mi zaf waşt ez to rê biba hetkar, labelê  çîyo ke ez eşkena teyna bikera, seba to duakerdiş o. Seba weşîya to û seba azadîya heme Kurdan ê dinya dua kena. Çîyo ke ti nika kenî zaf hêca yo, ma hêvî kenê ke rojêk aşitî û azadîye do temamê dinya de bandur biba. Keremê xo ra hertimî xurt bibe. Waştiş û duayê ma to reyde yê. To rê serkewtiş wazena. Wazena vaja ke weşîya to seba ma hemeyan zaf muhîm a. Serkewtiş, rojbaş.

Aktîvîstêko Koreyij: Merhaba Yusuf Îba. Ez Kore ra ya û wazena bi Korekî qisey bikera. Bi nîyadayîşê mi ganî merdimî wayîrê heqanê têduştan bo. Mi heşna ke wextêko derg o ti grevê vêşanîye de yî, seba naye ez to teqdîr kena. Hêvî kena ke ti do ser bikewî. Seba têkoşînê to yê vera bêedaletî û cîyakerîye, to rê sipas kena. Derbazîye ba. Seba şarê Kurdî zî waştişê azadîye kena.

Aktîvîsta Swîsreyije: Merhaba Yusuf, ez cinîyêka Azerî ya û Swîsre de ciwîyena. Mi hevalanê xo yê Kurdan ê Kanada ra çalakîya to heşnaye. Seba ke paştdayîş bida to nê dîmenî ancena. Çîyo ke ti kenî çîyêko xeylî bizehmet o û ez bi rêzdarî pêşwazî kena. Hêvî kena ti do ser bikewî. Seba temamê şarê Kurdî zî waştişê cuyêka azadîye kena.