Şubeyê Ameyî yê Komeleya Heqanê Merdiman (ÎHD) raporê xo yê derheqê kesanê ke Kurdîstan de pê pirodayîşê wesayîtanê zirxinan ê polîsan û leşkeran ameyî qetilkerdene eşkera kerd. Rapor de bale ameye ser antene ke 7ê hezîrane de Geverê Colemêrgî de tuto 5 serre Erdem Aşkan bi pirodayîşê wesayîtê çawîşê pîsporî dinyaya xo bedilaye.

ÎHDyî eşkera kerd ke 15 serranê peyênan de netîceya pirodayîşê wesayîtanê zirxitanan ê leşker û polîsan de 21ê înan tutî, pêro pîya 44 kesî ameyî qetilkerdene û 23ê înan tutî 94 hemwelatîyî birîndar bîyî.

Eşkerayîye de  bale ameye ser antene ke bajaranê Kurdan de şîdet û pêkewtişê ke pabesteyê meseleya kurdan ê, zaf qewimîyenê û ame vatene ke wesayîtê zirxinê ke tim û tim gêrenê bêqûral têgêrenê û heqê cuye binpay kenê.

Rapor de çîyê ke gerek bêrê kerdene wina ameyî rêzkerdene:

"* Wesayîtê zirxinê ke pê raporanê zanîstîyan yeno vatene ke wa waranê cuye de merê şuxulnayene, wa waranê cuye ra bêrê vetene,

*Leşker û polîsê ke bi pirodayîşê wesayîtan herême de bênê sebebê mergan, wa semedê înan tedbîrî bêrê girewtene,

* Nê polîs û leşkera ke pê wesayîtan danê hemwelatîyan ro û benê sebebê mergan înan, gerek bêrê muhakemekerdene.”