Serkêşanê PKKyî ra Alî Haydar Kaytan û Riza Altun, bi organîzasyonê KCDK-E, TJK-E û KOMAWî Koln de bi merasîmêkê heybetînî ameyî yadkerdene.

Keyeyanê Altun û Kaytanî ra merdimî zî tewrê merasîmî bîyî. Xeylê dezgehan çeleng şawit merasîmî, verê sahneyî de fotografê wird şehîdan ameyî daliqnayene û defterê vîrameyîşan ame ronayene. Sehne de ekranêk de zî sînevîzyonê serê Kaytan û Altunî ame mojnayene.

Deqayêkê rêzgirewtişî ra dima Pîr Huseyîn Bîldîkî Gulbang da, çirayî vistî ta û vat: ‘’Nê wird dêrweşan û raywananê raştîye dej kerd hingimên û xoverdayîş kerd cuya felsefe.’’

Merasîm de mesajê Rayber Apoyî ame wendene, şîîrê Kaytanî bi vengê Duran Kalkanî ameyî wendene.

Waka Riza Altunî Zohre Altun merasîm de vat: ‘’Rizayî Zîndanê Dîyarbakirî de xo ver da, o bi şerwanê azadîye. Înan 52 serran têkoşîn kerd. Ewro milê ma de barêka newîye est a. Seba layîqbîyayîşê înan ma do hîna zaf bixebitê.’’

Waya Kaytanî Ferîde Kaytan cat: ‘’Tîya de xeylê keyeyê şehîdan est ê. Ma şagîrtê rayîrê şehîdan ê. No proseso newe mesuldarî û erkî dano ma. Ganî ma hîna zaf bixebitê.’’

Mesajê birayê Kaytanî Denîz Kaytano ke zîndan de yo, ame wendene. Denîz Kaytanî vat: ‘’Embaz Fuat eşiqê Dêrsimî bi. Ey bire daye ke Rayber Apoyî reyde erdê xo azad bikero. O sereberzîya komelê elewîyan o. Ma do heta peynî bibê layîqê ey.’’

Nameyê Têkoşînê Azadîye yê Kurdîstanî ser o Ferda Çetinî qisey kerd û vat: ‘’Enbaz Riza û Fuatî mîrasê xoverdayîşî yê Dêrsimî pêro Kurdîstanî ra vila kerd. Mîrasê ey do tim rayîr bimojno ma û hesret û armancê înan zî do zerrîya ma de bibê.’’

Dima sînevîzyonî ameyî mojnayene.

Endama TJK-E Cahîde Goyî zî qisey kerd û Rayber Apoyî, keyeyan û şarê kurdî rê serweşîye waşte.

Hemserekê KNKyî Ahmet Karamusî qiseykerdişê xo de îfade kerd ke Kaytan û Altun efsaneyê Kurdîstanî yê û nameyê înan do domananê kurdan de biciwîyê.

Waka Mazlûm Doganî Nezakate Dogan, waya Hayrî Durmuşî Aytene Durmuş, îdarekarê KOMAWî Alî Konyrt û endama TJK-E Aytene Kaplan zî qisey kerd û şehîdî yad kerdî.

Qiseykerdişan ra dima mesajê serweşîye yê Hemserekê KCKyî Cemîl Bayikî bi sînevîzyonî ame mojnayene.

Hunermendanê TEV-ÇANDî deyîra ‘Ez Şehid im’ vate. Merasîm bi slogananê ‘Şehid Namirin’ û ‘Bijî Serok Apo’ qedîya û loqmayî ameyî vilakerdene.