Komîsyonê Hepisxaneyan ê Merkezê Komela Heqanê Merdiman (ÎHD) derheqê girewteyanê nêweşan ê ke hepsixaneyan de yê kombîyayîşêkê çapemenîye viraşt.

Kombîyayîş o ke Beşê ÎHD’yî yê Amedî de ameyo viraştene de avûkate Zeynep Ceren Boztoprake  da zanayene ke goreyê lîsteyê înan o aktuelî 457 kesî giran, heme ci hezar 333 girewteyê nêweşî estê. Boztoprake ard ziwan ke merdişê girewteyanê nêweşan yeno temeşekerdene û rîyê astenganê burokratîkan û qanûnan  girewteyî bi tabûtan yenê tehlîyekerdene û vat, “Hepisxaneyanê nê welatî de bi hezaran girewteyê nêweşî û merdim ê ke sînorê merdişî de yê estê.”

Hepisxaneyê Îmraliyî  wa cade bêro padayene

Boztoprake hîşyarîya Komîteya Vernîgirewtişê Îşkenceyî (CPT) ard vîrî û vat:'' Ganî Tirkîya goreyê pêameyîşanê mîyanneteweyîyan û Qanûnê Bingeyênî  têgêrayîş bikero. Hepsixaneyanê Tirkîya de caardişê tecrîdî, hetê sosyal-psîkolojîk-fîzîkî ra zerar dano girewteyan. Tecrîd vera merdimî yo. Tecrîd îşkence yo. Naye ra ganî tecrîd  cade bêro wedaritene. Hepisxaneyê Îmralîyî de Abdullah Ocalanî ser o tecrîdo girankerde yeno kerdene. No semed ra Hepisxaneyê Îmralîyî ganî cade bêro padayene û Abdullah Ocalan û embazê ci bieşkê heqanê xo yê qanûnîyan bixebitnê.''

Boztoprake ard ziwan ke ganî seba girewteyanê nêweşan bilezabez game bêro eştene û waştişê xo wina rêz kerdî:

* Ganî tepişteyî goreyê Protokolê Stenbolî bêrê muhayenekerdene.

* Ganî hekîm û personelê hepisxaneyî  perwerdeyê Protokolê Stenbolî bigêrê.

* Ganî xizmetê tibbî yê hepisxaneyî sey teberî  bêro dayene.

* Ganî şert hepisxaneyna bêrê rastkerdene.

* Ganî girewteyî bieşkê heqanê xo yê qanûnî bişuxulnê.

* Ganî tepişteyî heqê pêvînayîş û nuştişî yê ziwanê dayîke bişuxlnê.

* Ganî heqê pêvînayîşî û nuştişî bêrê  bicaardene.

* Ganî mekanîzmayê îdarî û hukmî  gerrekerdişê tepişteyan ser o vinderê û cipersayîşan abikerê.