Komîsyonê Huqûqî yê Beşê Antalya yê Komela Heqanê Merdiman (ÎHD), tepişteyanê Hepisxaneyê Antalyayî yê Tîpê L’yî reyde, ke grev qedênaybî, pêvînayîş kerd û derheqê binpankerdişan de raporêk amade kerd. Komîsyonî da zanayene ke dimayê qedênayîşê grevê vêşanîye û rojeyê mergî ê şîyêHepisxaneyê Antalya û Alanya û algorîtmaya Yewîya Odaya Tabîban nêweşxane û hepisxaneyan rê şawita.

Komîsyonî da zanayene rewşa tepişteyanê bi nameyê Hacîre Çaye û Gurbet Ozturke yê ke Hepisxaneyê Antalyayî yê Tîpê L’yî de yê giran a. Raporê komîsyonî de ame vatene, înan hesab kerdo ke Hacîre û Gurbete nêweşxane de rakewtiş gênê labelê wexto ke înan keyeyanê xo reyde pêvînayîş kerd, ame zanayene ke di tepişteyî ame berdene bi Nêweşxaneyê Perwerdeyî yê Antalya û teyna gonîya îna ameya girewtene, doktor zî nêdîyo, bi wesayîtê rîngî ê ameyî berdene û nezaretxaneyê serdinî de dayê vindernaye.

Komîsyonî da zanayene 36 tepişteyê ke kewtîbî grevê vêşanîye ra teyna 6 tepişteyê ke qawişa B-11’î de manenê, ameyê berdene bi nêweşxane û teyna texlîlê gonîya înan ameyo kerdene. Komîsyonî vat, “Qawişa E 7’î de 21 kesê ke grevê vêşanîye de bîyî, tu kesêk sewq ci yê bi nêweşxaneyî nêameyo kerdene, hetê doktoran ra zî nêameyê muayanekerdene. Teyna revîr de gonîya înan ameya girewtene û seba texlîlî ameya şawitene.”

Derheqê rewşa tepişteya bi nameyê Hacîre Çaye de ame vatene, hîna zî problemê dewqe û hemsencîya ci dewam kena. Tepişteyê cinîyê ke 4 mengî grevê vêşanîye de mendê û nêweşîyanê giranan ciwîyenê, goreyê giranbîyayîşê nêweşîya înan kontrolê muhîmî nêameyê kerdene.