Qezaya Qisle ya Dêrsimî de 16ê temmuza 2020î de tay dîmenî eşkera bîyî. Dîmenan de asayêne ke 3 polîsê pawitoxî yê qeymeqamê ê çaxî yê Qisle û îmam Adem Yilmazî cinîyan rê heqaret kenê. Nêrazîbîyayîşê şarî ra dima 3 polîsî û îmam 'wezîfe ra ameyî dûrvistene.'

Serebûtî ra di serran pey Îmam Yilmazî memleketê xo Trabzon de Serdozgerîya Komare ya şaristanî de gerreyê 89 kesanê ke vera ey nêrazîbîyayîşê xo mojnabi, kerd. Îmamî seba ke gerreyê xo apey bigêro 89 kesan ra 4 hezar lîra waşt. La 22 kesan no qebul nêkerd. Coka îmam Yilmazî vera nê 22 kesan Mehkemeya Cezaya Aslî ya Trabzonî de dewa akerde.

22 kesan ra Resul Dalkiliçî derheqê babete de Ajansê Mezopotamya rê qisey kerd.  Dalkiliçî îfade kerd ke o zî do Yilmazî dewa bikero û vat: ''No camêrd xeletîya xo sey çîyêkê holî lanse keno û merdiman ra pere wazeno. No camêrd seba komelî tehluke yo. Ma seba ke babete de eleqedar bibê xo resna wekîlan la înan eleqe nêmojna ma. No serebûtêko komelkî yo. Eke wekîlî bala xo nêdanê ney ser, bala xo danê çita ser? 

Kiştoxê cinîyan vera dîyenê la kesê sey ma yenê muhakemekerdene. Îqtîdar wazeno wa çew vengê xo nêvejo. Yew karmend nêeşkeno şarî rê heqaret bikero. Ma ney qebul nêkenê û do tim vera ney vinderê. Bedelê ci çi beno wa bibo ma do têkoşîn bikerê.''