Rayberê Şarê Kurdî Abdullah Ocalanî pê rolê aktîfî yê Amerîka û NATOyî 15ê sibata 1999î de teslîmê Tirkîya ame kerdene û 22 serrî yo Zîndanê Îmraliyî de yeno tecrîdkerdene. Semedê pêvînayîşê keye û avûkatan destûr nêdîyeno Abdullah Ocalanî. Tewr peyên 25ê adare de Rayberê Şarê Kurdî birayê xo Mehmet Ocalanî reyde 5 deqayan qisey kerd.

Tecrîdê vera Ocalanî 27ê temmuza 2011î ra nata yeno girankerdene. 8 serran ra dima 2-22ê gulane, 12-18ê hezîrane û 7ê tebaxa 2019î de ey avûkatê xo dîyî. 1999 ra nata semedê pêvînayîşê bi  Abdullah Ocalanî hezar û 819 reyî muracatî ameyî kerdene, nînan ra 442 hebî ameyî qebulkerdene. 2020 de cewab nêdîya 89 muracatan. 29 muracatî pê bahaneya 'bira mehkeme' ameyî redkerdene. Emser zî heta nika (29ê tebaxe) 125 muracatî ameyî kerdene, 19 muracatî pê bahaneya 'bira mehkeme' ameyî redkerdene. Avûkatan çele de 7, sibate de 8, adare de 15, nîsane de 20, gulane de 18, hezîrane de 2, temmuze de 17, tebaxe de 18 muracatî ameyî kerdene. Tepişteyê dewaya PKK û PAJKî 258 rojî yo vera tecrîdî grevê vêşanîye de yê. Grev 14ê temmuze ra nata 5 rojan ra vurîya 15 rojan. Grevê vêşanîye yê Mexmûrî roja 254. de, grevê vêşanîye yê Kampa Lavrioyî roja 238. de dewam kenê.

Destûr nêdîyeno ke Abdullah Ocalan û tepişteyê bînî yê Îmraliyî Hamilî Yildirim, Veysî Aktaş û Omer Hayrî Konar keye û avûkatanê xo bivînê. Goreyê Buroyê Huqûqî yê Asrinî no binpaykerdişê heqan û îşkenceyo sîstematîk o.

Serra 2019î de grevê vêşanîye ra dima Abdullah Ocalanî 5 reyî avûkat û keyeyê xo reyde pêvînayîş kerd. La pêvînayîşê bi avûkatan ê 7ê tebaxa 2019î û pêvînayîşê keyeyî yê bi 11ê tebaxa 2019î ra dima tecrîdî newe ra dest pêkerd.

Vera tecrîdê Îmraliyî verî 12ê êlula 2012î de pêro tepişteyan çalakîya grevê vêşanîye yê 68 rojan kerd. Grev vengdayîşê Ocalanî ser o qedîya. Çalakîye ra dima 3ê çeleyê 2013î de wekîlê DBPyî Ahmet Turk û Ayla Akat Ata şîyî Îmrali. Nê pêvînayîşî ra dima heyetê HDPyî î dewlete heta 5ê nîsana 2015î binê nameyê 'prosesê dîyalogî' şîyî Îmrali û Ocalanî reyde pêvînayîş kerd.

5ê nîsana 2015î ra dima prosesê dîyalogî qedîya û tecrîd ame kerdene. 5ê êlula 2015î de 50 sîyasetmedaranê kurdan pê waştişê 'Abdullah Ocalanî reyde pêvînayîşî'  Rêxistina DBPyî ya Amedî de grevê vêşanîye da destpêkerdene. Çalakîye ra dima 11ê êlula 2016î de Mehmet Ocaşan şi Îmrali. Coka sîyasetmedaran roja 8. de çalakîye qedînaye.

8ê teşrîna peyêne ya 2018î de Hemsereka KCDyî û Wekîla Colemêrgî ya HDPyî Leyla Guven zî tede Zîndanê Amedî de grevê vêşanîye dîya destpêkerdene. 1ê adare de grev pêro zîndanan ra vila bi. Hewlêr de endamê HDPyî Nasir Yagiz, Kampa Mexmûrî de Fadîle Tok, Strasbourg de 14 kesî, Galler de Îmam Şîş û Germîyan de Herêm Mexmd kewtî grevê vêşanîye.

Wekîlê HDPyî Dêrsime Dag, Tayyîp Temel, Murat Sarisaç 3ê adara 2019î de Rêxistina HDPyî ya Amedî de tewrê grevî bîyî. Semedo ke waştişê înan nêameyî caardene înan 30ê nîsana 2019î de dest pê rojeyê mergî kerd. Zîndanan de zî 15 tepişteyan 10ê gulane de dest pê rojeyê mergî kerd. Ugur Şakar 20ê sibate de şaristanê Krefeldî yê Almanya de verê mehkeme de xo vêşna û 22ê adare de merd. Zîndanan de Zulkuf Gezen, Aytene Beçet, Zehra Saglam, Medya Çinar, Yonca Akici, Sîraç Yuksek, Mahsûm Pamay mabênê 17ê adare û 5ê nîsane de şehîd bîyî.

Çalakîya 200 rojan ra dima avûkatan 2-22ê gulane, 12-18ê hezîrane û 7ê tebaxa 2019î de Ocalan dî û vengdayîşê Ocalanî ser o 26ê gulane de grevê vêşanîye û rojeyê mergî qedîya. 2020 de Zîndanê Îmraliyî de 3ê adare de zîyaretê keyeyan û 27ê nîsan de zî pêvînayîşê bi telefonî ameyî kerdene.

CPT mabênê 6-17ê gulane de çarçewa zîyaretê zîndanan de şi Zîndanê Îmraliyî. 5ê tebaxa 2020î de raporê xo de zî eşkera kerd ke Îmral, de tecrîdêko giran esto. CPTyî vat: ''Pêro tepişteyî hucreyanê xo de têna yenê tecrîdkerdene.'' CPTyî venga dezgehanê tirkan da ke cezaya muebede ya girankerde newe ra bêra ercnayene û ganî tepişteyî tim bieşkê pêvînayîşî bikerê.

Tirkîya pê qedexeyêkê neweyî cewab da raporê CPTyî. Pê bahaneya qedexeyî reyna tecrîd ame girankerdene. Avûkatan semedê pêvînayîşî xeylêk muracatî kerdî la muracatê înan rixmê bira Mehkemeya Heqanê Merdiman a Ewropa (MHME) ameyî redkerdene.

Avûkatanê Ocalanî ra Îbrahîm  Bîlmezî pare kerd ke Zîndanê Îmraliyî de huqûq nêno caardene û vat: ''Zîndan de mekanîmayê kontrolî, huqûqo herêmî û muhakemerdişo berz zî nênê caardene. No zî mojneno ke tecrîdê Îmraliyî sey warê teberê huqûqî çarçewa konseptêkê mîyanneteweyî de yeno kerdene. Sîstemê tecrîd û îşkenceyî yê Îmraliyî goreyê huqûqê mîyanneteweyî zî îlegal o. Tirkîya pê nê kerdişan Peymana Konseya Ewropa, raporanê MHME û CPTyî, mekanîzmayanê Konseya Ewropa çin hesibnena.''