Berpirsîyarê Karê teberî û hemsereko hetkar ê HDPyî Hîşyar Ozsoyî derheqê gefanê Erdoganî yê serê Rojavayî de ajansê ma rê qisey kerd. Ozsoyî vat ke di hetê polîtîkaya Erdoganî estê. Hetêk ra wazeno miletperweranê Tirkîya xo dima bianco û bireso serkewtiş. Hetêna ra zî wazeno ke bi nê gef û hêrişan serê bêîstîqrarîya sîyasî, îqtîsadî û komelkî bigîro. Ozsoyî dewamê qiseykerdişê xo de nê vatî:

HEDEFO BINGEYÊN QEZENCÊ KURDAN Ê

“Konjonktur no yo, Erdogan wazeno ke nê çîyî serê weçînitişanê cayîyan de tesîr bikerê. Wextê ci weçînitişan dir eleqedar o la polîtîkayêka stratejîke ya derge yena rayraberdene. Eke weçînitişan de zî biser bikewo seba raşte ra wedartişê heme qezencan do bikewo dewre. Hedefo bingeyên ê na polîtîka qezencê Kurdan ê.

Ma vînenê ke Rojakewtena mîyanêne ya newî yena dîzaynkerdene. Dewleta Tirkî xo rê hemparê xeletî weçînayê. Kamca çete esto hemine arê dayê. Polîtîkaya Tirkîye ya îqtîdar ra fînayîşê Esadî nêmenda.”

'ŞARO KURD NÊ HÊRIŞAN SEY ÎŞXAL ERCNENO'

“Nuqteya binpaykerdişê sînorî de Tirkîya sûc kena. Kurdî do nê rê razî nêbê û do nê sey îşxal biercnê. Ma do heme platforman de biyarê ziwan ke ma hemverê nê de yê. Nê 2 serranê peyênan de çi keso ke reaksîyon ramojneno yeno destbendkerdene. Leyla Guvene zî seba vatişanê xo derheqê Efrînî amî tepiştene.”

'MA HEMVERÊ DEWLETÊK DE YÊ KE AGÊRAYA MAKÎNEYA ŞERÎ'

Ozsoyî peynîya qiseykerdişê xo de nê vatî: “Tirkîya de çew nêeşkeno reaksîyonê xo bi rayîranê demokratîkan ramojno. Dewlete bi temamî agêraya makîneya şerî. Kurdî nê qebûl nêkenê. Netîceyê dejanê pîlan de Kurdî yenê têhet. Bi Efrîn heme Kurdî hetê hîsî ra ameyî têver. Hêrişê winayênî do yewîya neteweyî ya Kurdan hîna bikero zêde û bihêz.”