Kurdîstan de polîtîkayê çînkerdişî bi serran o dewam kenê. Îqtîdar bi şerê taybetî bajaranê Kurdîstanî de polîtîkaya asîmîlasyonî rayra beno. Îqtîdaro ke bi operasyonanê qirkerdişê sîyasîyî wazeno şarî bigero binê zextî, bi tecrîdê serê Rayberê Şarê Kurdî Abdullah Ocalanî heme şaran fîneno mîyanê krîzî. Şarê kurdî yo  ke wazeno berê Îmraliyî bêrê akerdene ke meseleya kurdan bêra çareserkerdene raştê hêriş û zextê îqtîdarî yeno. Îqtîdar meseleya kurdan nêvînayîşî ra yeno.

Endama Sendîkaya GENEL-İşî Ayşe Guler ard ziwan ke meseleya kurdan tesîrê heme kurdan û komelî kena û nê vatî: ''Meseleya tewr pîle ya meseleya kurdan asîmîlasyonê ziwan û kultur o. Ma tirkî nêzanayêne, mekteb de perwedeyo tirkî girewtêne û fam nêkerdene. Heta ke ma tirkî musayî xo ra mekteb hinî qedîyayêne. Her ziwam erjîyaye yo la polîtîkayê asîmîlasyonî yê vera ziwanê ma hêrişê vera estbîyayîşê ma yê. Ma wazenê wa kurdkî zî na herre de bibo ziwanê perwerdeyî. Ma  wazenê wa kurdkî sîyaset, perwerde, weşîye de sey fermî bêro şuxulnayene. Cuyeya kurdan kurdkî ya. Ma serê sibayî bi kurdkî bêne hîşyar û şewe bi kurdkî rakewnê.  Semedê nê û bi desan sebebanê bînan ganî meseleya kurdan bi rayîrê sîyasetî bêro çareserkerdene. Ma zî sey şaranê dinya wazenê herra xo de bi ziwan û kulturê xo biciwîyê.''

Endama DİSKî Hanife Kardaş zî ard ziwan ziwan muxatabê meseleya kurdan Îmrali de yo û nê vatî: ''Ganî na meseleya bêro çareserkerdene. Nê welatî de krîzî tewr zaf tesîrê cinîyan kenê û ma cinîyî wazenê nê krîzan werte ra wedarê. Ma sey cinîyan haştîye wazenê. Meseleya kurdan yena manaya şerî,taxê ma yenê bêasayîşkerdene. Ciwanê ma madeyê kungkerdiş û fuhuşî rê yenê kaşkerdene. Zîhnîyeto faşîst her warî de hêrişê kurdan keno. Vera nê hêrişan ganî ma semedê çareserkerdişê meseleya kurdan têkoşîn bikerê. Ganî her kes destê xo bikero binê kerra. Ma semedê çareserkerdişê mesele veng bidê îqîtdar û partîyanê bînan û çîyo ke destê ma ra yeno bikerê. Semedê ameyoxê şarê ma û na herre ganî na meseleya bêra çareserkerdene. Aderesê çareserkerdişî zî Îmrali yo.''