Panelo ke Bern Europaplatz de ame viraştene sereko pêroyî yê ÎHDyî Ozturk Turkdogan û dîrektora HWRyî yê Tirkîye Emma Sinclaire sey qiseykerdox tewrê ci bîyî. Kîşta xeylî Kurdistanij û dostanê înan de çalakwanê ke grevê vêşanîye de bîyî zî tewrê panelî bîyî. Hemserekê KESKî yo verên Lamî Ozgenî moderatorîya panelî kerde.   

 ‘TERSENÊ KE ÎQTÎDARÊ XO VÎNDÎ BIKERÊ’

Turkdoganî ard vîrî ke Tirkîye de hema hema heme heqê merdiman yenê peygoşkerdene û nê vatî: “Binê nameyê ‘mucadeleyê hemverê terorî’ de hemverê muxalefetî de zextêko pîl yeno bicaardene. Eke şima Kurd ê şima bi mazaretê PKKyî bîyayîşî û eke şima muxalif ê bi mazaretê yewn organîzasyonî yan yenê tepiştene yan zî karê xo ra yenê eştene.

Îqtîdar vîndîkerdişê hêzê xo ra zaf terseno. Çalakîya Mayê Şemeyî ya ke seba aşitî û edaletî yena viraştene bê ke sebebêk ramojîyo amî qedexekerdene. Hukmatêk bifikrê ke problemê ci mayanê ke aşitî wazenê dir esto. Îqtîdar terseno ke çalakîyêka tewr qijkeke zî do peynîya ci biyaro. Asayîş de meclîsêk esto la Erdogan Tirkîye bi qerarnameyan rayra beno. Ewropa zî nê halî rê reaksîyonêkê mirdî nêmojnena ra.”

 ‘KESO KE ŞIMA DO Ê DIR AŞITÎ QISEY BIKERÊ SER O TECRÎD BICCARDIŞ NÊBENO’

Turkdoganî da zanayene ke AKP bi polîtîkayanê şerî xo pay ra verdano û wina vat: “Înan OHAL wedart la bi qanûnanê neweyan Tirkîye yew merkezî ra yena rayraberdene. Meclîsêk esto la tu tesîrê ci çinyo. Hukmat ver bi weçînitişanê cayîyan hîna zaf giranîya xo dano polîtîkayanê şerî. Naye dir eleqedar zî zextê serê muxalefetî hîna keno vêşî.

Ocalan heme heqanê xo ra ameyo mehrûmkerdene. Tecrîdê serê Ocalanî tecrîdêkê hemverê hemeyê komelî yo. Ocalan rayberê PKKyî yo û Tirkîye de sey kesêk ke seba aşitî ci dir bêro qiseykerdene yeno qebûlkerdene. Eke ê Ocalanî rê wina kenê no yeno na mana ke ê her kesanê bînan rê zî her çîyî eşkenê bikerê.”

SINCLAIRE: QANÛNÊ MUCADELEYÎ YÊ VERA TERORÎ HEMVERÊ MUXALEFETÎ DE YENÊ ŞUXULNAYENE

Turkdoganî ra dima dîrektora Human Rights Watchî yê Tirkîye Emma Sinclaire qisey kerd û vat ke nika Tirkîye de hemverê muxalefetî de zextê zaf pîlî estê. Sinclaire nê vatî: “Nika Tirkîye de tenya Kurdî û çepgêrî nê her beşê komelî ra kesî raştê zextan yenê. Goreyê raporê ma yê HRWyî ra 2018 de 250 hezarî kes Tirkîye de zîndanan de yo. Na hûmare ewro hîna vêşî ya. Nê 250 hezaran kesan ra se ra vîstê înan binê nameyê ‘mucadeleyê hemverê terorî’ de  yenê tepiştene. No halêko nealelade yo. Tu welatêk de şima bi asanî nêeşkenê nê reqaman bivînê.”