Kadikoy de ciwananê ke bi deyîranê kurdkî govende girewte bi îşkenceyî ameybî destbendkerdene. Komeleya Huqûqnasan a seba Azadîye (OHD) şubeyê xo yê Îstanbulî de derheqê babete eşkerayîye daye. Hemsereka Pêroyî ya Komeleya Heqanê Merdiman (ÎHD) Erene Keskîn zî tewrê kombîyayîşî bîye.

Kombîyayîş de avûkatan ard ziwan ke ciwanî pê kelemçeyanê peykîyan, rîyî ser ameyî ramardnayene û pê Marşê Mehterî înan rê îşkence ame kerdene.

Îdrîs Akpinaro ke raştê îşkenceyî ameyo ard ziwan ke gama ke ciwanî raştê îşkenceyî ameyî ey waşt dîmen bianco, coka hetê polîsan ra ameyo destbendkerdene û vat ê wesayîtê polîsan de raştê îşkenceyî ameyî û qereqol de zî nê îşkenceyî pê Marşê Mehterî dewam kerd. Akpinarî vat polîsan ê tehdît kerdî ke wa qala derbkerdişî mekerê.

Erene Keskîn zî ard ziwan ke îşkence hinda eşkera sey polîtîkaya dewlete yeno caardene û wina vat:  “No têna yew îşkence nîyo, îşkneceyo nîjadperest o. No îqtîdar dişmenê kurdan o. Muhalefet zî îqtîdar zî dişmenîya vera kurdan ser o propagandaya weçînitişî keno. 90yan de dewlete îşkenceyê xo nimitêne la ewro eşkera yeno kerdene. Na rewşe goreyê pêkerdişanê mîyannetewîyan nîya. Na dewlete dişmene heme kurdan a.”