HDP bi şîarê 'Çareserî ma yê, şer û îşxalî rê ney' Meydanê Kartalî yê Îstanbulî de mîtîngî kerd. Bi hezaran kesî herikîyayî meydanî. Meydan de alayê HDPyî, pankartê kurdkî û tirkî daliqîyayî. Girseyî çar hetan ra kewenê warê mîtîngî. Polîsan kerd ke serê beşdaranê mîtîngî bigêrê. Polîsan domano 10 serreyo ke kincê neteweyî dabî xo ra, nêgirewt warê mîtîngî.

Mîtîng de Hemvervatoxê HDKyî Cengîz Çîçekî qisey kerd û vat: ''Ma seba haştîye bi serran bedelî dayî. No îqtîdar musebîbê krîzan o, dizd o. Îqtîdar seba ke dizdîya xo binimno wazeno şerî bivejo. Nê îqtîdarî vera kurdan, elewîyan, cinîyan û xoza şer dayo destpêkerdene. Ma nêwazenê şarî nê şerî de bimirê.''

Çîçekî seba ke muxalefetî tezkereyê Efrînî rê vatbi 'heya' nêrazîbîyayîşê xo mojna û vat: ''Eke şima çareserîyêka mende wazenê îrade û vervatoxê kurdan bişinasnê, biewnê şarê kurdî vano se. Eke şima AKPyî reyde musabeqaya nîjadperestîye bijerê nêeşkenê ser bikewê.''

Çîçekî ra dima Hemsereka Pêroyî ya HDPyî Pervîne Buldan vejîyaye sehne ser û vat: ''Şima bi şîarê 'çareserî ma yê' ameyî tîya. Ma çareserî yê. HDP do pêro meseleyanê nê welatî çareser bikero. Çunke xoverdayîşê ma rûmetên o, krîter û têkoşînê ma yê rûmetênî est ê. Ê sindoqan de pê HDPyî nêeşkayî coka nika pê kumpasê Dewaya Kobanê û dewaya qefilnayîşî kenê ke hêrişê ma bikerê. Ma do qetî verê înan de milê xo çewt mekerê. HDP do sindoqan de cewabê şima bido. Ê wazenê reyna debikewê Rojawan, Şingal, Mexmûr... Şarê Tirkîya şer nê  haştîye wazenê. Ma sey HDPyî hetê şaran de yê. Sey ê bînan no îqtîdar zî do pê înkar û îmha nêeşko meseleya kurdan werte ra wedarno. Wextê prosesê çareserîye de Abdullah Ocalan dewre de bi û haştî est bi. 3 serrî yo Ocalan nêeşkeno avûkatanê xo bivîno. Ma reyna veng danê ke biverdê Ocalan avûkatan, keyeyê xo û heyetanê xoseran bivîno. Bingeyê pêro meseleyan de tecrîd est o. Eke tecrîd bêro wedaritene Abdullah Ocalanî reyde nê welatî de her kes do bi hêvî biewno ameyoxê xo ra.''

Buldane dewamê qiseykerdişê xo de hêrişê vera elewîyan û dezgehanê înan şermezar kerdî û veranêdîyayîşê Aysele Tugluk sey 'dişmenîya vera kurdan pênase kerd. Buldane dima bale ante rayîrê hîrêyînî ser û vat: ''Êyê ke binê nameyê 'helalkerdişî' de kurdan reyde yenê têhet wa xo rê şerm bikerê ke têna wextê weçînayîşan de kurdan anê xo vîrî. Kurdî heta ke têrîameyîşêko rûmetên nêbo do heqê xo kesî rê helal nêkerê. Ma reyna anê ziwan ke ma adresê çareserîya pêro krîzan ê. Têkoşînê ma têkoşînê edalet û haştîye yo.''

Buldane ra dima LaWje vejîyaye sehne ser. Mîtîng pê deyîranê LaWje qedîya.