HDP bi şîarê 'Çareserî ma yê, şer û îşxalî rê ney' Meydanê Kartalî yê Îstanbulî de mîtîngî keno. Bi hezaran kesî herikîyayî meydanî. Meydan de alayê HDPyî, pankartê kurdkî û tirkî daliqîyayî. Girseyî çar hetan ra kewenê warê mîtîngî. Polîsî kenê ke serê beşdaranê mîtîngî bigêrê. Polîsan domano 10 serreyo ke kincê neteweyî dabî xo ra, nêgirewt warê mîtîngî.

Rixmê astengîyan zî Edîrne, Bursa, Kocaelî ra bi hezaran kesî zî pê wesayîtan û otobusan yenê warê mîtîngî. Hemwelatîyî meydan de govende gênê. Cinîyî zî pê kincanê xo yê neteweyîyan bale ancenê xo ser. Girseyî vera slogananê sey 'Biciwîyo xoverdayîşê zîndanan', 'HDP şar o, şar tîya de yo' vanê.

Aysele Tugluk rûmetê ma ya

Aktîvîstê Têgêrayîşê Cinîyan ê Azadan (TJA) bi posterêkê girdî yê Aysele Tugluk kewtî meydanî. Cinîyî pê tîlîlîyan ver bi meydanî şîyî û înan waşt ke wa tepişteyê nêweşî bêrê veradayene. Kincê neteweyî yê cinîyan xeylêk bale ante û cinîyan vera sloganê 'Aysele Tugluk rûmetê ma ya', 'Cinîye, Cuye, Azadîye' vatî.

Hemsereka HDPyî Pervîne Buldan, Vervatoxê HDKyî Cengîz Çîçek reyde xeylêk temsîlkarê partî û rêxistinan zî tewrê mîtîngî bîyî. Merdim û keyeyanê tepişteyanê nêweşan û tepişteyanê ke înfazê înan ameyo vêşnayene zî mîtîng de cayê xo girewt.

Sloganê 'Bê Serok jiyan nabe'

Meydanê mîtîngî cade bi de û coşê mîtîngî zî zêdîya. Beşdaranê mîtîngî bi deyîran govende girewte, rixmê hewayê germî zî coş zêdîna, sloganê sey 'Bê Serok jiyan nabe', 'HDP şar o, şar tîya de yo' vatî.

Mîtîngî pê deqayêkê rêzgirewtişî dest pêkerd.

Verî Hemserekê HDPyî yê Îstanbulî Ferhat Encuyî qisey kerd û îfade kerd ke beşdarîya nê mîtîngî hêzê HDPyî eşkera kena. Hemsereka HDPyî ya Îstanbulî Îlknure Bîrol zî girseyî ra pers kerd ke 'adresê çareserîye ça de yo?' Girseyî zî yew fekî ra vat: ''HDP.''