Vizêr mîtîngê Amedî yê HDPyî ra dima ciwanan dest pê rayraşîyayîşî kerd û rixmê hêrişanê polîsan zî sloganê 'Ocalanî rê Azadîye' vat. Bi des hezaran kesan rixmê provakasyonê Asayîşê Amedî zî waştişê azadîya seba Ocalanî bi slogananê 'Biciwîyo Serek Apo', 'Ciwanî fedayîyê Apoyî yê' û 'Bê serek cuye nêbena' ardî ziwan.

Asayîşê Amedî xîret kerd ke fotografê Aysele Tugluk û pankarta 'Tepişteyanê nêweşan rê azadîye' bigêro. Cinîyanê HDPyî destûr nêda provakasyonê polîsan û posterê Tugluke berd cayê mîtîngî.

Dima ke mîtîng qedîya ciwanan dest pê rayraşîyayîşî kerd û sloganê 'Abdullah Ocalanî rê azadîye' vat.

Asayîşî taxa Ofîsî bi seyan polîsan girewte binê ablûqa û hêrişê şarî kerd. Polîsan ciwanî destbend kerdî.

Dima dîya zanayene ke ciwanêko seqat raştê hêrişê polîsan ame. Polîsan ciwano seqat erdî ra derg kerd, da piro û destbend kerd.

Polîsanê ke Kuçeyê Ekîncîlerî girewt binê ablûqa, hêrişê ciwanan kerd. 4 ciwanê ke vera polîsan vejîyayî, ameyî destbendkerdene. Ciwanêko bîn zî raştê hêrişê pawitoxan ame û hîşê ci sereyê ci ra şi. Polîsan hêrişê dayîkêka ke vatêne 'wina mekerê' kerd. Polîsan ciwanêko bîn qasê nêm saetêke erdî ra derg kerd, pay na ser.

Rojnamegeran xîret kerd ke dîmenê şîdetê polîsan bigêrê la polîsan  tedaya înan zî kerde.

Rayraşîyayîşî ra dima netîceya hêrişê polîsan de 7 kesî ameyî destbendkerdene.