Mîtîngê HDPyî yê Amedî de şarê kurdî reyna wayîrê îradeyê xo vejîya û paştî daye partîya xo. Sîyasetmedaranê kurdan mîtîng de vera polîtîkaya şerî yê îqtîdarî semedê xurtkerdişê têkoşînî veng da.

Hemserekê Pêroyî yê KCDyî Berdan Ozturkî Warê Îstasyonî ra veng kerd  îqtîdarî » vat:  '' Şima 5ê nîsana 2015 de tecrîdê serê birêz Ocalanî xorî kerd û bi waştişê zîhnîyetê se serran waşt bi kiştiş û hepskerdişê kurdan biqedînê û kurdê xo biafernê. Warê Îstasyonî reyna mojneno şima ke çare Soçîn de nîyo, çarê Birêz Ocalan o. Kurdî çok nêdanê. Senî ke heta ewro vera zextanê şima de milê xo çewt nêkerd do ewro ra tepîya zî sereberz têkoşîn bikerê. Pêvînayîşê Birêz Ocalanî hesabê şima nêame. Şima  proses xeripna la se beno wa bibo şima do tewr peynî de a masa de ronişê. Rîyê îqtîdarê faşîstî ra Tirkîya mîyanê krîzê giranî de ya. Ma venga muxalefetî danê, vanê werêameyîş. Heta ke hesabê Zîlane, Dêrsim û Roboskî mero persayene ma senî yenê werê.''

Hemserêka Pêroyî ya DBPyî Salîha Aydenîz bi kirmanckî û kurmanckî şar selam kerd û vat: ''Îqtîdaro ke pê zext û şerî xo weye keno polîtîkayanê înkar û asîmîlasyonî ra hêz geno. Coka her ca de şer îlan keno. Semedê çînkerdişê destkewteyanê kurdan Başûrê Kurdîstanî de şer keno. Başûr û Rojawanê Kurdîstanî de şer kenê. Her roje Mexmûr û Şingalî ser o bombayan varnenê. Ma tîya ra reyna vanê bi polîtîkaya şerî na mesele çareser nêbena, caverdê. Başûr de ewro polîtîkaya îhlaqî yena rayraberdene. Seba ke Başûrê Kurdîstanî bikerê veng hêrişê vera Zaxoyî ame kerdene. Aye ra tim hêriş kenê û çekanê kîmyewîyan şuxulnenê. No şer Tirkîya aver nêbeno, têna ci rê dano vînîkerdene. Ewro Rojawanî ra yew xiçê kerra nêerzîyaya tîya, bîlasebeb hêrişê ci kenê. Wazenê DAÎŞî herême de reyna ganî bikerê. Şarê kurdî do destûrê nê şerî medo. Îqtîdar şino ça heqbeyê ci de dişmenîya vera kurdan est a. Soçî, Madrîd, Astana, Tahran her ca de wina yo. Na dişmenîya vera kurdan do peynîya şima bîyaro. Birêz Abdullah Ocalan semedê kurdan xeta sûr a. Rayîrê çareserî Îmrali ra ravêreno. Îqtîdar û muxalefet wa nê bizanê.''

Hemserekê Pêroyî yê HDPyî Mîthat Sancarî zî wina qisey kerd: “Merhaba Amed, gelê me yê birûmet, jinên azad, ciwanên têkoşer hevalên hêja merhaba ji we re hun hemû bixêr hatin serseran serçavan hatin. Êyê ke wazenê HDPyî biqedînê wa nê îradeyî bivînê. Wa vindertişê qerardarî yê nê şarî ra bitersê. Îqtîdar dizdîye keno, bi polîtîkayanê rantî nanê şarî dizneno, krîzî xorî keno û wazeno bi polîtîkaya şerî payra bimano. Ma do nê plananê înan ê kaosî vindarnê, înan senaryayonê şerî de bifatisnê. Seba ke hêrişê Rojawanî bikerê ber bi ber gêrenê ke destûrê şerî bîgêrê. Ma veng danê heme hêzanê demokrasîyî ke wa vera na polîtîkaya şerî vejîyê. Ma bi têkoşînê hemparê verê înan bigêrê. Wa partîyê muxalefetî zî wezîfeyê xo bîyarê ca û goreyê menfeatê şarî têbigêrê. Seba ke haştîye bêro welat ganî verî sîyasetê şer û pêkewtişî biqedîyo. Birêz Ocalanî hîrê serî vatbi 'ez eşkena hewteyêk de pêkewtişan vindarnê.' Seba ke Ocalan şerî mevindarno 20 serrî yo binê tecrîdê giranî de yeno tepiştene. Semedê çareserî ganî miheqeq tecrîd bêro wedartene. Ma do sey HDPyî semedê nê rolê xo kay bikerê. Qala ma yê vatişî û hêzê ma yê kerdişî est o. Ma wayîrê tecrubeyê bi serran ê. Embazê ma zîndan de bedel danê, şarê ma fedakarîya pîle keno. Ma zî kenê ke layiqê înan bi. Yewna derd, waştiş û hesabê çîn o. Ma do pêro pîya ameyoxo ke tede pêkewtiş, çeke, talan û gonî çîn ê  ronê. Em dibêjin bijî azadî aşitî û serkeftin. Bîminin di xêr û xweşiyê de.”