Amed de mîtîngê  Partîya Demokratîke ya Şaran (HDP) yo ke bi şîarê 'Çareserî ma yê, şer û îşxalî rê ney' ame organîzekerdene bi tewrbîyayîşê des hezaran kesan dest pêkerd. Rixmê hewayê germî Riha, Dîlok, Semsûr, Dêrsim, Êlih, Sêrt, Wan û çar hetanê bajarî ra şarî verê xo da Warê Îstasyonî.

Aktîvîstê TJA, Meclîsê Dayîkanê Haştîye, temsîlkarê TUAY-DER, MEBYA-DER, MED-DER, TUHAD-FED, Komeleya Cinîyan a Roja, OHD, İHD, DİK, GOÇ-DER, DFG,  Komeleya 78dan tewrê mîtîngî bîyî.

Mîtîngde Hemserekê Pêroyî yê HDPyî Mîthat Sancar, Hemserekê Pêroyî yê KCDyî Berdan Ozturk û Hemserêka Pêroyî ya DBPyî Salîha Aydenîz do qisey bikerê.

Endamê Meclîsê Ciwanan ê HDPyî bi slogana ''Faşîzm do birijîyo, azadîye ser bikewo'' û deyîran kewtê warê mîtîngî. Mîtîngî rixmê provokasyonê polîsan bi merşê ''Çerxa Şoreşê'' dest pêkerd. Polîsan mudaxaleyê sîstemê vengî kerd. Naye ser o mabênê HDPyijan û polîsan de pêrodayîş vejîya. Şarî bi slogana ''Bê Serok jiyan nabeno'' cewabê polîsan da.

Polîsan dima ra dest na posteranê Aysele Tugluk ser. Wekîlê HDPyî Omer Ocalanî sehneyî ra vat Asayîşê Amedî provokasyon keno waşt wa polîsanê xo peyser bianco. Cinîyan ê HDPyî nêverda polîsî posterî bigêrê û înan posterê Tugluke akerd.

Badê provokasyonê polîsan qiseykerdişê akerdişê mîtîngî hetê endamê Komîteya Amadekerdişî Mehmet Şirin Şehîrî ra ame kerdene û dima ra Hemsereka HDPyî ya Amedî Gulîstane Atasoy qisey kerd. Atasoy vat: ''Waştişê azadîye wina yew çîyo ke qet çîyêk nêeşkeno verê ci de vindo. Amed reyna tarîx nuseno. Vera şer, dişmenê cinîyan û tecrîdî vengê xo berz keno. Hol aya ke ti est ê Amed. Amed hêvîya demokrasîyî yo, Amed bi xo serkewtiş o.''