Hêrişê vera Partîya Demokratîke ya Şaran  (HDP) û qetilkerdişê xebetkara partîye Denîze Poyraz xeylêk bajaranê Kurdîstan û Tirkîya de ame protestokerdene.

Îstanbul de şar Meydanê Şîşhaneyî de ame pêser. Çalakwananê ke sloganê sey ''Şehîdî nêmirenê'' û ''Qetilkar Polîs'' eştî, waş Tunelê Taksîmî ra ver bi Meydanê Şîşhaneyî rayra şirê la polîsan destûr nêda.  Çalakwanan bi vatişê ''şima qetilkarê'' polîsî protesto kerdî. Şar rixmê heme astengkerdişan ver bi Meydanê Şîşhaneyî rayra şi. Dima ra eşkerayîye ameye dayene.

Hemsereka HDPyî ya Îstanbûlî Elîfe Bulut vat: ''Ma do pêro pîya Têkoşîn bikerê û nê îqtîdarî bidê war.''

Hemserekê HDPyî yê Îstanbûlî Erdal Avciyî zî ard ziwan ke no hêrişêko plankede yo vat: '' Dewleta ke qetilkaran nas kena verê înan reyna akerd.''

Dayîka Berkîn Elvanî Gulsume Elvanî zî vat: ''Hinî bes o. Destê xo serê domananê ma ra biancê. Dejê heme dayîkan yew o, rengê hesranê ma yo. Hersê ma do qetilkaran bifatisno.''

Parlamentera HDPyî Huda Kaya zî  bale ante ser ke polîsan qetilkar Onur Gencer bê kelemçeyan bîna ra vet û vat: ''Polîsî qetilkaran pawenê. Dima ra fotografê qetilkarî vejîyayî werte ke Haleb, Sûrîye de kampana OSOyî de perwerde dîyo. Merkezê înan pêrune yew o. Merkezê rêxistina sûcî Qesr a.''

Vervatpxa HDKyî Esengule Demîr zî vat: ''Denîze Poyraz cinîyêka kurde û kedkere bî. Hem têkoşînê nasnameyî hem zî têkoşînê azadîye dayene. Ganî vera îtîfaqê sûcî ma zî bibê yew. Pê têkoşînê hemparî ê do şirê ma bimanê.''

Badê çalakîya roniştişî ya 5 dewqayan çalakîye qedîyaye. Polîsan hêrişê ciwananê ke slogan eştêne kerd û xeylêk kesî destbend kerdî.

Reyna Wan, Riha û Adana de zî hêrişê vera HDPyî ame protestokerdene  û mesajê pîlkerdişê têkoşînî wayîrvejîyayîşê HDPyî ameyî dayene.