Îstîxbaratê Almanî derheqê PKK’yî de bultenêko taybet amade kerd

Îstîxbaratê Almanî, herinda teqîbkerdişê fealîyetanê casusîyan ê rejîmê Erdoganî û rêxistinanê Nazîyan de, sazgehanê Kurdan keno hedef.

Îstîxbarato ke serê PKK’yî de bultenêko taybet dayo vetene, da zanayene ke ganî zext û qedexeyê serê Kurdan dewam bikerê.

Wexto ke her kuncikê dinya de vera tecrîdkerdişê Rayberê Şarê Kurdî Abdullah Ocalanî grevê vêşanîye û çalakîyî yenê kerdene, sazgehê îstîxbaratê zereyî yê Almanya Rêxistina Pawitişî ya Qanûnê Bingeyênî derheqê PKK’yî de bultenêko taybet weşana.

Bulten çerçewaya roporanê serran ê îstîxbaratî yê serê qedexekerdişê PKK’yî de çerçewaya stratejîya krîmînalîzekerdişê têkoşînê azadîye yê Kurdî de ame amadekerdene. Rixmo ke PKK Almanya de qe xebate nêkero zî  raporî de ame bewlîkerdene ke “Almanya de zereyê rêxistinanê xerîban ê hedravîyartîyan ê  Îslamî nîyê de” PKK o yo tewr xurt o.

Rêxistina Pawitişî ya Qanûnê Bingeyênî ya ke merkezê aye Koln de yo, bultenê xo bi nê sernameyan weşana: “Peyperdeya şerê Kurdan”, “Awankerdiş, îdeolojî û armancê PKK'yî", "PKK Almanya û Ewropa de PKK”, "Qedexekerdişê organîzasyonan", "Îdareyê Ewropa”, "Karê xo yê medyaye”, "Xebitnayîşê înternetî", “Karê xo yê seba pêroyîye”, “Têkilîyê mabênê PKK û grubanê çepî yê hedravîyartîyan”,  "Karê lobî" û "Fînansman".

Bulteno ke 41 rîpelî yo de, sazgehê ke bi îdîaya ‘pabestişê xo PKK’yî reyde estê’ ameyê padayene, bi hîrayîye tede ca girewt. Bultenî de ame bewlîkerdene ke, rixmê qedexeyanê serê PKK’yî, na rêxistene Almanya de zereyê 10 serran de hêzê xo zêdetir kerdo. Bale ante ser ke, babeta bingeyên a çalakîyanê  PKK’yî, rewşa Ocalanî û hêrişê dewleta Tirkî yê serê Kurdan a.

MEDYAYA KURDÎ KERDE HEDEF

Her çiqas nê serranê peyênan de qet hedîseyêk nêqewemîya zî, îstîxbaratî îdîa kerd ke Almanya de potansîyelê PKK'yî yê şîdetî esto. Bultenî de sazgehê Kurdan ê ke bi rengêkê fermîyî Almanya de xebitîyenê, kerdî hedef. Bultenî de ziwanê dewleta Tirkî ame bikarardene. Îstîxbaratî îdîa kerd ke PKK zaf wesîteyanê medyaye bi kar ano û sazgehê medyaya Kurdî Yenî Ozgur Polîtîka, ANF û Stêrk TV kerdî hedef.

Bultenî de ame îdîa kerdene ke Yenî Ozgur Polîtîka rojnameyêk o ke hetê PKK'yî ra yeno vetene. Seba kanalê Kurdî Stêrk TV’yî yo ke serê Norwecî ra weşane keno ame vatene ke “Propagandaya PKK'yî keno”.

Seba ANF'yî yo ke merkezê  ci Hollanda de yo zî, ame îdîakerdene ke ‘çarçeweya sîyasetê dazanayîşî yê PKK'yî de bi torra muxabirî ya Tirkîye, Iraq, Îran, Sûrîye û welatanê Ewropa de kar kena. Da zanayene ke “Ajans rojane bi Tirkî, Kurdkî, Îngilîzkî, Elmanî, Rûskî, Spankî, Erebkî û Farskî weşanê kena."

PAŞTDAYÎŞÊ ALMANAN, ÎSTÎXBARAT ACIZ KERDO!

Bulten de 15'ê Sibate, 21'ê Adare, 4'ê Nîsane, 15'ê Tebaxe, festîvalê menga Êlule, 9'ê Teşrîna Verêne, 22'ê Teşrîna Peyêne, 27'ê Teşrîna Peyêne sey 'serrnameyê serre yê PKK'yî' dayî zanayene û hêzê çepî yê Almanî û Partîya Çepî hedef ameyî mojnayene.

Hetê bînî ra paştdayîşê Partîya Çepî yê seba şarê Kurdî, îstîxbarat aciz kerdo. Îstîxbaratî îdîa kerd ke PKK cehd keno ke bi rayîrê Partîya Çepî ya ke Meclîsê Federalî de gruba xo esta, ‘sîyasetê xo vila bikero’.

Beşê ‘peynî’ yê bultenî de da zanayene ke, “PKK Tikrîya de xebatanê terorîstan keno û seba  qedexeyê serê PKK’yî yê Almanya, welat û eyalatan de hetê Rêxistina Pawitişî ya Qanênê Bingeyênî ra do bêro teqîbkerdene.

GELO BULTEN HETÊ HETKARÎYA SEREKÊ ÎSTÎXBARATÎ YÊ TIRKÎ RA AME AMADEKERDENE?

Serekê Rêxistina Pawitişî ya Qanûnê Bingeyênî Hans-Georg Maassen, dimayê dîmenanê serê hêrişê Chemnîtzî yê nîjadperestî vatibi ‘beno ke dîmen sexte bo’, wezîfeyî ra amebi girewtene û Thomas Haldenwang herinda ey de amebi cakerdene. Sînan Selen û Mîchael Nîemeîerî zî bibî hetkarê Haldenwangî. Balkêş o ke Selen wexto ke  rejîmê Erdoganî reyde têkilîyêka xurte dest pêkerde, seba naye nê wezîfeyî de ame cakerdene.

Seleno ke pêvînayîşanê mabênê Tirkîya û Almanya de serra 2015’î ra nata wayîrê rolêkê muhîmî yo, Çele ya 2016'î  de dimayê kombîyayîşê îstîşareyî yê serdestîya AKP’yî û hukmatê Merkele bi temsîlkarê Almanya yê mekanîzmaya 'têkoşînê hemparî yê vera terorî’. Na mekanîzma seba koordînekerdişê têkoşînê hemparî ya her di dewletan a vera têgêrayîşê azadîye yê Kurdî û têgêrayîşê çepî yê Tirkîya ameyebî awankerdene.