Qezaya Gayrettepe ya Îstanbulî de 2yê adare de înşaetê kulubê bi nameyê ''Masquerade'' de şewat vejîyabi û şewat de 29 karkeran dinyaya xo bedilnabî. Eşkera bi ke şewat seba ke tedbîrê qîmî nêgêrîyayê vejîyayo.

Goreyê doneyanê Meclîsê ÎSÎGî wextê îqtîdarê AKPyî de heta nika 33 hezar karkeran cînayetanê karî de dinyaya xo bedilnaye.

Şahîdê qirkerdişê kulubî ra Hasret Uzunî ANFyî rê qalê serebûtî kerd.

Uzunî vat ke înşaetê kulubî cara qeçax bibi û vat: ''Ez zî karkeran ra yew bîya. Înşeat de asayîşê ma çin bi û destûrê viraştişî zî çin bi. Seba ke kulub heta roşanî bêro temamkerdene ma rê teda ameyêne kerdene. 10 karê cîyayî heman wextî û heman cayî de ameyêne kerdene. Qet yew tedbîr zî nêameyêne girewtene.

Sensorê şewatî dewre de nêbîyî, tupê hewnakerdişê şewatî nêxebitîyayêne û berê tebervejîyayîşê lezî çin bi. Şewatî ra teyna kesêk xelisîya. O zî cayêkê nimiteyî ra vejîya. Patronan nêverdayêne ke ma qisey bikerê û vengê ma şoro çewî. Çunke hema şaredarîye ra destûr nêamebi girewtene.''

Uzunî îfade kerd ke patronî seke çîyêk nêbîyo cuya xo rê dewam kenê, cuya karkeran xem nêkenê. Uzunî vat: ''29 kesî merdî la patronî seke kergî merdê têgêrenê. Çunke zanenê ke cezayêke do nêwerê.''