Hemvervatoxê Partîya Çep a Keske yê Amedî Abbas Şahînî derheqê turê diyînî yê weçînayîşanê serekkomarîye de ANFyî rê qisey kerd. 

Şahînî da zanayene ke înan 14ê gulane de birêka şaşe nêdaye û vat: ''Ma bire dabî ke îqtîdarê faşîstî bin bivisnê, hetê sîyasî ra birijnê, destê ma ra çi bêro seba ney bikerê. Xora tay meseleyî estê ke ganî ma nînan ser o rexneyanê xo bidê. Belê ma nêeşkayê se ra 70ê rayan bigêrê, tîya de kêmasîyê ma est ê. La ganî bizanîyo ke 8 serrî yo vera ma teda est a. Xeylêk rayê ma zî dizîyayê. Rixmê her çîyî bira ma ya 14ê gulane nêvurîyaya. Ma do 28ê gulane de weçînayîşê serekkomarîye de raya xo bidê Kemal Kiliçdarogluyî û û bi nê hawayî cewabêkê xurtêrî bidê îqtîdarê faşîstî.''

Abbas Şahînî ard ziwan ke 28ê gulane de ê do bi moralê pîlî şorê sindoqan ser û vat: ''Hûmara wekîlanê ma kêm biba zî ganî no moralê ma nêxeripno. Sey roja verêne ma bira xo ser de yê. Turê diyînî de ma do ney bi xurtî vejê were û nê îqtîdarê faşîstî rê vajê hînî bes o. Ma do têkoşînê nikayênî geşêr bikerê.''