Hemsereka HDPyî ya Wanî Handane Karakoyun û Hemvervatoxê Partîya Çep a Keske yê Wanî Veysî Dîlekçîyî derheqê tedbîranê asayîşê weçînayîşî de agahîyî dayî ANFyî.

Veysî Dîlekçîyî ard ziwan ke ê xebatanê xo rê dewam kenê û vat: ''Embazanê ma yê avûkatan û Baroyê Wanî tedbîrê lazimî girewtî û xeylêk avûkatî wezîfedar kerdî. Ma do 13ê gulane de roja şemeyî mîtîngê xo yê pîlî bikerê. Spekulasyonê cîyayî est ê, ganî şarê ma goş nêdo înan ro. Şarê ma wa raya xo bido Partîya Çep a Keske. Ma do weçînayîşanê serekkomarîye de raya xo bidê Kemal Kiliçdarogluyî la partîya ma Partîya Çep a Kesk a.''

Handane Karakoyun vist vîrî ke weçînayîşanê verênan de meseleyê cîyayî est bîyê, mudaxeleyî est bîyê la nika moralê şaristanî pîl o. Handane vat: ''Amadekarîyê ma yê cidîyî est ê. 2,5  serrî yo ma sindoqan ser o xebitîyenê. Warê asayîşê weçînayîşî de ma pêro Wan de rêxistinanê komelê sivîlî reyde pêvînayîşî kerdî. Bi beşdarîya Baroyê Wanî û OHDyî 500 avûkatî do sindoqan de wezîfe bikerê. Çimdarê ma zî do uca de bibê. Ma seba asayîşê weçînayîşî amadekarîyê xo temam kerdî. Şarê ma qetî do wayîrê partîya xo, sindoqanê xo û îradeyê xo vejîyo.''