Wekîla Partîya Çep a Keske ya Mêrdînî Bêrîtane Guneş netîceyê weçînayîşî ANFyî rê ercnayî.

Bêrîtane Guneş îfade kerd ke şar bi rûmetî weçînayîşan de wayîrê înan vejîyayo û vat: ''No îrade serê her çî de yo, ercîyaye yo. Şarê ma bi zelalî hêvîyê xo ardî ziwan. Ma zî goş na waştişanê şarê xo ser. Ma prosesê weçînayîşan de armanc kerd ke Mêrdîn de 6-0 bikerê û 100 wekîlan bişawê Meclîsî. La wina nêbi. Çimdarîyê min ê nê netîceyan wina yê:

* Ma xebatê weçînayîşan bi partîyêka newîye kerdî.

* Erdlerzî ra semed xebatî bêmoral bîyî.

* Îtîfaqî ser o mezgî têmîyan bîyî. Ma nêeşkayî mezgê şarî zelal bikerê.

*Çend destê ma ra ame ma ber bi berî gêrayî la ma nêeşkayî xo biresnê zaf keyeyan.

* Tay rayî hem dîyayê CHPyî hem zî dîyayê Partîya Çep a Keske. CHPyî bi rayîrê destekê ma yê seba serekkomarîye kerd ke herême de weçînitoxanê ma bivisno destî. Ma her ca de vat ke raya xo bidê Partîya Çep a Keske, dara xo mojnaye. La qestî ra CHPyî xebatêka gemarine kerde.

* Netîceyanê 14ê gulane ra dima şar de bêhêvî, hêrs, xemgînî û rexne virazîyayî. No tewir yeno famkerdene û meşrû yo. 

* Prosesê weçînayîşan de şar bi zelalî nêame îqnakerdene.

*Şarî kombîyayîşî waştî, şarê ma waşt ke rexne û pêşnîyazanê xo bîyaro ziwan.''

Guneşe bale ante ser ke tarîxê Komara Tirkîya de meclîso tewr nijadperest û kanwaz ronîyayo. Guneşe vat: ''Aseno ke dewrê neweyî de rojê zehmetî verê ma de yê la ma vera nînan têkoşînê xo rê do dewam bikerê. Êyê ke vanê cinîyî wa bêrê weyekerdene, Meclîs de yê. Tewiro ke îrade û hêzê cinîyan nêhesibneno Meclîs de yo. Ma do verê nînan bigêrê. Ma do destkewteyanê cinîyan bipawê û têkoşînê xo pîlêr bikerê.''