No dewr dewrê vergê harî yo. Nê vergî rê serê hardî bes nêkerd nika êdî asmên de yo. Asmên ra keweno mîyanê şarî, wazeno şarî ra perçeyan ca bikero. Verg tawo ke keweno mîyanê birre yew pesê nêbeno nêweno, fekê xo reşt kamcîn pese ci ra perçe keno ci ra. Bi na tore yew pese nê bi desan, sedan pesan keno bîrîndar. Vergê şarê kurdî dewleta faşist a tirk a. 13 Aşma Qanune de xo verda mîyanê şarê Maxmurî. Şarê Maxmurî yo ke bi serrayo onurê mordemîye sevekneno. Bîyo abîdeyê xoverrodayîşî. Çi dejê ke mordem meşîkîyo xeyal bikero dîyê. Cenetê xo ra erzîyo bîyo mahkumê cehenemî û cehennem çarno cenetî. Cuya komînal awan kerda. Zerarê xo kesî rê çîn o. Ti bê bivîne ke dewlata faşiste kewta pîsîrê nê şarê erja û delalî ci ra nêginena war.

Dewleta faşist a verga hare 13 Aşma Qanune de çar pawitoxê şarê Maxmurî ci ra kerdî cira. Çar pawitoxan canê xo da. Verga hare hesab kena ke şarê Maxmurî biters o. Sere biteweno. Hemverê dewleta faşist vileyê xo bikero çewt. Eke şarê Maxmurî bitersênê raya verênê tawo ke to ê hardê înan ra kerdî cira, to waşt înan bikerê korîcî ê bitersênê. Ê teslîmê to bibîyênê. Ê verê to de bibîyênê vile çewt. Ê domanê koyanê asîyan ê. Teslîm nêbenê. Sere nêtewenanê. Vile çewt nêbenê. To waşt înan bitersnê ê bi domananê xo yê astengdaran ra vecîyay kuçan. Wayîrê pawitoxanê xo vecîyay. Înan ne va  neweş, ne va astengdar, ne va kal û pîr pêro pîya ginayî peyê cenezeyanê pawitoxanê xo. Ê bî lasêrêde yê hêrsî herekîyay. Ê nêberbay. Înan hêrsê xo zêdêna.  Yew teknîk o ke bi nê hêrsî bişîkîyo çîn o. Şarê Maxmurî nê galimê pêyenî de îspatkerd ke teknîkê şima yo tewr modern teyareyî kî nêşkînê nê şarî bitersnê. Îradeya nê şarî pola ra wa. Têyareyê şima kî nêşkînê na îradeyê bişiknê. No şar bi na îradeya azad teqez serbikewo.

Çime: Yenî Ozgur Polîtîka