Partîya Çep a Keske û HDP Wan de seba turê diyînî yê weçînayîşê serekkomarîye bêmabên xebitîyenê. Wan de Kemal Kiliçdarogluyî se ra 66ê rayî girewtbî. Roniştoxê Wanî xo amade kenê ke turê diyînî de se ra 80ê rayan bido Kemal Kiliçdarogluyî.

Endamê Meclîsê Partîya Çep a Keske Fatîh Şahînî ANFyî rê qisey kerd û ard ziwan ke ganî şarê Wanî wayîrê raya xo ya 14ê gulane vejîyo û seba haştî, edalet, têdûştî û azadîye şoro sindoqan ser. Şahînî vat: ''Seba rijnayîşê nê sîstemî û binvistişê nê rejîmê zorbazî verê ma de firsendêko pîl est o. Ma do nê firsendê tarîxî ra fek vera medê.'' 

Hasan Koçakî vat: ''Bir û raya şarê ma zaf girîng o. Şarê kurdî têkoşînê demokrasî keno. Ganî ma na çarçewe de raya xo bidê. Her raye ercîyaye ya.''

Aktîvîst û Pisporê Îstatîstîkan Sînan Okî vat: ''Seba ke ma cewabê polîtîkayanê qeyûmî bidê 28ê gulane de verê ma de firsendêko pîl est o. Ma do şorê sindoqan ser. Ma do derba peyêne 28ê gulane de bidê faşîzmî ro.'' 

Taşdan Şîmşeko ke Wan de rojnamegerîye keno vat: ''Seba qedînayîşê rejîmê şexsêkî, seba demokrasî ganî ma raya xo bidê Kemal Kiliçdarogluyî. Ma venga şarê xo danê ke nê weçînayîşî girîng ê, coka wa raya xo bido.''