Yewna şaredarîya Îtalya hemwelatîya rûmete daye Rayberê Şarê Kurdî Abdulah Ocalanî. Şaredarîya Rende ya Cosenza ya ke pabesteyê herêma Gabrîa ya Îtalya ya hemwelatîya rûmete daye Abdullah Ocalanî.

Serekê Şaredarîya Rende Marcello Mannayî qiseykerdişê xo yê meclîsê şarederî de vat: ''Ma pê nê qerarî muhîmîya heqanê merdiman ramojna. Vera binpaykerdişê heqan ê Tirkîya gama winayên hewce kerdêne. Konfederalîzmo demokratîko ke Abdullah Ocalan vano modelê komelêkê alternatîfî yo.''

Endama Komîteya Kulturî ya Meclîsê Şaredarîye Marta Petrusewicz zî vist vîrî ke dezgehanê pîlan ê heqanê merdiman ra Buroyê Haştîye yê Mîyanneteweyî (IPB Îtalya) 2016 de  'Xelata Haştîye' daye Abdullah Ocalanî û vat: ''No tesaduf nîyo. Abdullah Ocalano ke prosesê haştîye yê Rojhelatê Mîyanênî de wayîrê rolê pîlî yo, sembolê mucadeleyê azadîye yê şarê kurdî yo. 22 serrî yo Îmrali de tecrîd yeno rayraberdene û heme heqê merdiman yenê binpaykerdene.''

Endama Meclîsê Şaredarî Lisa Sorrentino zî vat: ''Dewleta tirka ke estbîyayîşê kurdan înkar kena, dewanê ci bombardumankene, bi hezaran kurdî qetil kerdî, bi serran o kurdan eciqnena. Xora Pêkerdişê Îstanbulî ra xo peyser antiş zî rewşa Tirkîya ramojneno.''

Heta nika xeylêk şaredarîyanê Îtalya hemwelatîya rûmete daye Abdullah Ocalanî. Mîyanê nînan de şaredarîyê Palermo, Napoli, Palagonia, Reggio Emilia, Riace, Martano, Pinerolo, Castel de Giudice, Castel Bottaccio, Berceto, Cinquefrondi, Fossalto zî estê.