Bado ke Şaredarîya Miksî ameye xespkerdene polîsê tirkan cade kewtê şaredarîye û verê ci bi wesayîtanê zirxinan girewt. Badê xespkerdişê Şaredarîya Miksî verê banê DEM Partî yê qeza de eşkerayîye çapemenîye ameye dayene.

Hemşaredara Miksî Nebahate  Benek vat: ''Tarîxî ra nata înan semedê qeza çîyêk nêkerd. Nika reyna qeyûm tayîn kerd û destna îradeyê şarî ser. Siba reyna sindoqî do bêrê ronayene û şar reyna wayîrê îradeyê xo bivejîyo. Ma do ser bikewê, ê do bin bikewê.''

Hemşaredar Ayvaz Hazirî zî vat: ''Wa her kes bizano ke wayîr û îradeyê na qeza ma yê. Miks têna banêkê şaredarîye nîyo. Ma do ewro ra tepîya zî heme karanê xo pîya bi şarê xo rayra berê. Her kesî rê serkewtiş.''

Hemşaredara Bajarê Pîlî yê Wanî Neslîhane Şedal zî nê vatî: ''Ewro îradeyê Miksî ame xespkerdene. Bi nê caardişî ke qet sîstemêkê hûqûqî û ehleqî de cayê ci çîn o, ewro îradeyê şarê Miksî yeno xespkerdene. Ma tîya ra veng danê îqtîdarê AKPyî; ma zanê çend şino şima gonî vînî kenê.  Bi polîtîkayanê îradeyê kurdan nêşinasnayîşî, bi xespkerdişê îradeyê şarî şima nêeşkenê biresê cayêkî. Hîrê dewrî yo ke şima kenê bi qeyûman payra bimanê. 31ê adare ma 14 heme şaredarîyê Wanî girewtî. Ma zanê ke no şima rê bi derd.

Ma tîya ra veng danê Harunî ke tîya sey qeyûmî ame cakerdene, ti siba eşkenê tîya vejê mîyanî şarî de bigerî, ti eşkenê biewnî rîyê şarî ra? Ma veng danê walî û qeymaqemî; şima eşkenê tîya ra bigêrî û şarî rê xizmet bikerî? Şima pê kamyew rîyî eşkenê nê kuçeyan ra bigêrê ke şima îşxal kerdî? AKP çîyo ke vîjnayîş de nêeşka bigîro bi dizdîye xesp keno.

Ê ke seserrî yo ziwanê ma înkar kenê, kulturê ma înkar kenê, estbîyayîşê ma rê tehemul nêkenê 8 serrî yo îradeyê ma nêvînayîşî ra yenê û wazenê polîtîkayanê xo yê qirkerdişî bidomnê. Ma veng danê şarê xo; wa bêro wayîrê waştişanê xo yê demokratîkan bivejîyo, wayîrê îradeyê xo û keyeyê xo bivejîyo. Ma do miheqeq ser bikewê, qeyûmî do şirê, no şar do ser bikewo.''