Dewa Roboskî ya qezaya Qilêbanî ya Şirnexî de 28ê kanûna 2011î de  dewleta tirke ya îşxalkere bi teyarayanê şerî  19ê înan domanî 34 kesî qetil kerdî. Serrgêra 13ine ya Qirkerdişê Roboskî de kesê ke ameyî qetilkerdene serê mezelanê xo de ameyî yadkerdene. Keyeyan serê sibayî ra kincê sîyayî dayê xo ra û verê xo mezelan.

Hemserekê Pêroyî yê DBPyî Keskîn Bayindir û Hemserekê Pêroyî yê DEM Partî Tuncer Bakirhan zî tede xeylê temsîlkarê partîyanê sîyasîyan, rêxistinê komelê sîvîlî, baro û kesî tewrê yadkerdişî bîyî.

Bi nameyê keyeyanê Roboskî Halime Encu ya ke qirkerdiş de lajê ci Serhat ame qetilkerdene, qisey kerd. Halime Encu nê vatî: ''13 serrî ravêrtî la hema zî domanê ma qey ameyî qetilkerdene safî nêbîyo. Kiştoxî ça hay ça de yê? Zerrîya ma vêşaye. Çi guneyê nê domanan bibê. Şima bedenê înan kerdî parçe parçe. Zalimî, kiştoxî… Rîyê yew bîdonî ra şima qetil kerdî. Şima hûmayî ra nêtersayî? Hinî bes o. Ma semedê Roboskî edalet wazenê. Domanê ma şîyî, ê ke peyde mende wa biciwîyê. Nê qikerdişan rê bes o. Beranê zîndanan akerê. Ma hinî pîya biciwîyê. Wa hinî dayîkî mebermê. Ey zalim û kiştoxî; dejo ke ma ant mela bikewo zerrîya şima zî.''

 Hemserekê Pêroyî yê DBPyî Keskîn Bayindir zî nê vatî: ''Wa dayîkê ma bizanê ke dewaya edaletî ya 34 kesan têna dewaya dayîkanê Roboskî nîya, dewaya heme Kurdîstanî ya. Qirkerdişê Roboskî vera şarê ma ne verêne ne zî peyên o. Seserrî yo vera kurdan qirkerdişî yenê kerdene û qetilkarî nînê cezakerdene. Zerrîya ma vêşna la ma do wayîrê mîrasê înan bivejê. Heta ke azadîye bêro ma do têkoşînê xo rê dewam bikerê.''

Hemserekê Pêroyî yê DEM Partî Tuncer Bakirhan zî wina vat: ''Kerdoxî eşkera yê. Heta ke kiştoxî bêrê cezakerdene na darba gonîne do bidejo. Ma tîya ra înan hîşyar kenê ke Anqara de Roboskî nêvînayîşî ra yenê. Şima seserrî yo qirkerdişan kenê. Pê qirkerdişan şima nêeşkayî probleman çareser bikerî.  Dayîkê ma 13 serrî yo bi dej û hêrsî tîya domananê xo yad kenê. Dewaya xo teqîp kenê. Seba ke şima nêvînayîşî ra yenê Roboskî nêqedîyeno. Ganî helêke cuwa ver kerdoxê qirkerdişî bêrê muhakemekerdene. Roboskî meseleya kurdan a. Heta ke Roboskî nêro çareserkerdene û meseleya kurdan çareser nêbena.

Gama ke ma tîya qisey kenê heyetê ma Îmrali de Birêz Abdullah Ocalanî reyde pêvînayîş keno. No muhîm o. Ganî berê Îmraliyî bêrê akerdene û pêvînayîşî dewam bikerê. Ma hêvî kenê pêvînayîşê Îmraliyî serra newî de dewrê neweyî akenê.  Ma hêvî kenê cigêrayîşê heq û edaletî yê dayîkanê Roboskî serra newî de yeno caardene.

Ewro hetê bînî yê sînorî de wayûbirayê ma est ê. Rojawan de kurdî est ê. Her bomba ke şima erzenê Rojawanî zerrîya dayîkanê Roboskî kena parçe parçe. Dayîke erjîyayeyî ma soz danê şima. Ma do na dewa teqîp bikerê. Şima têna nîyê. Tirkî, kurdî,erebî, elewîyî,rayapêroyîya demokratîke şima reyde yê. Heta ke heq bêro caardene, kerdoxî bêrê cezakerdene, dewlete nê qirkerdişan dir bêro têrî ma do têkoşîn bikerê.''