14ê hezîrana 2018î de merdim û pawitoxamê Wekîlê ê çaxî yê AKPyî yê Riha Îbrahîm Halîl Yildizî Pirsûs de keyeyê Şenyaşarî ra 3 kesî qetil kerdbî. Emîne Şenyaşar û lajê ci Ferît Şenyaşar roja 846. de verê Edlîyeya Riha de çalakîya xo domnaye. Nobeta Edaletî 9ê Adara 2021î de amebî destpêkerdene.

Şenyaşaran ewro verê edlîye de çalakîya xo ya peyêne kerde. Şenyaşaran da zanayene ke eke 18ê temmuze de roniştişê dewaya ke do Mehkemeya Cezaya Giran a 3. ya Meletî de bêro kerdene, edalet mero ca, ê do nobeta xo Anqara de bidomnê.

Nobeta peyêna ke bi komkî ameye kerdene de Wekîlê Partîya Çep a Keske Ferit Şenyaşarî qisey kerd. Şenyaşarî vist vîrî ke nobeta înan 846 rojî dewam kerde û semedê paştdayîşî her kesî rê spas kerd. Şenyaşarî vat, ''Birayê mi yo ke  panc serrî yo hucreyê yewkesî de maneno, ma wazenê wa bêro veradayene. Badê muhakemekerdişê 18ê temmuze ya dayîke şina keye ya zî bi nê pankartî şina Anqara.''