Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî rê dewam kena.

Şenyaşaran ewro roja 184. de dest pê nobete kerd. Nobete ra verî pê telefonî Fadil Şenyaşarî reyde qisey kerd ke 3 serrî yo Zîndanê Xarpêtî de hucreyê yewkesî de tepişîyeno.

Ferît Şenyaşarî wextê nobete de vat: ''Dewaya ma dewayêka heqdar a. No qirkerdiş têna vera ma nê vera pêro wayîranê wijdanan ame kerdene. Ma têna semedê xo ney semedê her keso ke bêedaletîye dîye edalet wazenê. Tirkîya de partîyê neweyî qala edalet, huqûq û heqî kenê. Eke qala nînan kenê wa bêrê ma hetî de ronişê.''

Ferît Şenyaşarî bale ante ser ke rewşa weşîye ya Emîne Şenyaşar vera bena xirabêr û vat: ''Rixmê nêweşîyanê xo dadîya mi her roje rayîrê betonînî ser de ronişena. No zulm o. Ma her roje wazenê dozgeranê ke vera ma ra vîyarenê şinê bivînê la ê red kenê. Ma ewro şînê cayê dozgerî ke derheqê dewa de agahîyan bigêrê. Hele ma biewnê 'berê edlîye berê edaletî' yo yan zî berê zulmî yo.''