Endamê Komîteya Merkezê PKKyî Cemal Şerîkî derheqê tecrîdê Îmraliyî, menga xoverdayîşî û weçînitişan de ANFyî rê qisey kerd. Qiseykerdişê Şerîkî ra qismêko kilm wina yo:

"Ez sere de Rayber Apoyî silam kena ke Îmrali de xoverdayîşê tarîxî dano. Ma menga hezîrane de yê. Na menge tarîxê partî û şarê ma de sey menga xoverdayîş û fedayîbîyayîşî yena zanayene. Menga hezîrane de şehîdê girdi dîyayî. Reyna xoverdayîşê girdi zî ameyî kerdene. Coka na menge de têna şehîdî nînê yadkerdene, eynî wextî de gerek rêçê şehîdan de xoverdayîş zî bêro xurtkerdene. Hemrayê ma Zîlane (Zeynep Kinaci), Serhildane (Sema Yuce), Gulane (Filiz Yerlikaya) menga hezîrane de şehîd bîyî. Hemra Zîlane, Sema û Gulane xeta fedayî ya PKKyî de beyraqa xoverdayîşî tewr berzî de têşaye û şehîd bîyî. Hemleya 1ê Hezîrane ya ke sey hemleya diyîne ya Hemleya 15ê Tebaxe yena zanayene zî na menge de dîyaye destpêkerdene. Coka menga hezîrane hem menga şehadetan hem zî menga xoverdayîşî ya.

Tecrîdê serê Rayber Apoyî bi Îmralinî sînordar nîyo. Yeno waştene ke no tecrîd serê şaranê Kurdîstan û Tirkîya de zî bêro caardene. Rejîmê şerê taybetî ke Imrali de ameyo ronayene ûca ra kirişîyeno Kurdîstan û Tirkîya. Çoka tecrîdê Îmrali û şero taybet o ke Kurdîstan de yeno rayraberdene pabesteyê yewbînan ê. Senî ke vera nê polîtîkayanê şerî Rayber Apo xoverdayîşo tarîxî dano, gerek Kurdîstan û Tirkîya de xoverdayîşo ke xoverdayîşê tarîxî yê Rayber Apoyî esas geno bêro dayene. Sebebê tecrîdî yo verên oyo ke şarê kurdî Rayberîya ci ra raqilnê. Seba ke Rayber Apo bi hêzê fîkrê xo rayîrê sîyasetî bewlî keno, ameyoxî ewro ra vîneno û problemanê çareser keno bi paştdayîşê hêzanê mîyanneteweyî ame tecrîdkerdene. Zanê eke fîkrê Rayber Apoyî biresê şaran û raşt bêrê destgirewtene probleman çareser kenê. Seba ke Rayber Apo rayîr nîşan medo, yeno tecrîdkerdene. Coka tecrîdî xorî kenê. Çiwaxt tecrîd yeno xorîkerdene dewrêko newe dîyeno destpêkerdene.

Rejîmê AKP-MHPyî yê şerê taybetî hîzbîkontrayî zî girewtê cayê xo kenê ke dewleta tirke goreyê xo îdare bikero. Hakîmîyetê dewlete fînayo dest. Bi rojdemanê sexteyan wazeno rayîrê her kesî bewlî bikero. Hetê bînî ra plananê xo fîneno dewre. Kurdîstan de semedê şerê leyminî rol dayo hîzbîkontrayî. AKP 21 serrî yo îqtîdar de yo la hema zî cayê ci pêt nîyo. Coka verî kerd ke teşkîlatê Fetullah Gulenî serî ra ca bidê xo. La mabênê înan de pêrodayîşê îqtîdarî vejîya û tewr peynî de bi gonî qedîya. Faşîzmê AKP-MHPyî weçînitiş de ser nêkewt, pîya hîzbîkontrayan îradeyê şarî xesp kerd. Pê îmkananê dewlete û xîleyan çîyo ke waşt fîna dest. Kurdî, elewîyî, sosyalîtî û hêzê welatperwerî bin nêkewtî. Weçînitiş de şarî îradeyê xo mojna la tay herêman de îrade ame xespkerdene. "