Wendekarê zanîngehê Şerzan Kurt 12ê gulana 2010î de Mugla de hetê polîsanê tirkan ra amebi qetilkerdene. Hêzanê Kede û Demokrasîyî yê Mugla serrgêra 14ine ya qetilkerdişê ci de Meydanê Sinirsizlikî de Şerzan Kurtbi eşkerayîyêke yad kerd. Eşkerayîye de pankartê sey ''Şerzan Kurt bêmerg o'' ameyî akerdene û sloganê ''Polîso kiştox do hesab bido'' ame vatene.

Nameyê Hêzanê Kede û Demokrasîyî ser o Sultane Turgan çalakîye de qisey kerd û da zanayene ke polîso kiştox Gultekîn Şahîn nêameyo cezakerdene, cade veradîyayo. Sultane vat: ''Dewlete erkdarê xo pawit. Ma 14 serrî yo na dewa teqîb kenê û nê kuçeyan de benê vengê Şerzanî. 

Şerzan seba ke kurd bi û bi kurdkî qisey kerdêne kişîya. Heta ke edalet bêro caardene ma do têkoşîn bikerê.''