Şewato ke bin şewe mabênê qezaya Xana Axparî ya Amed û qezaya Şemrexî ya Mêrdînî de vejîya bîlançoya ci eşkera bena.

Dewijan vat Şewato ke dewa Tobiniyê ya qezaya Xana Axparî de têlanê ceyranî ra verî sey çîqan vejîya wextê kilmî de resa dewanê Têznê, Hatdirînê, Reşan, Dêrê, Kelekê, Herberê û Bexcayê û heta Awbendê Goksu dewam kerd.

Goreyê eşkerayîya Wezîrîya Weşîye şewat de Amed de 3 kesan û Mêrdîn de 2 kesan  dinyaya xo bedilnaye û 10ê înan giranî 44 kesî birîndar bîyî.

Şarî vat seba ke mudaxaleyê selahîyetdaran kêm mend înan bi îmkananê xo mudaxaleyê şewatî kerd. Xeylêk hêgayê lazut û xeleyî yê ramiteyî zî vêşayî û xeylêk heywanî bi vêşayîşî merdî.

Sîyasetmedarê kurdî saetanê şewî ra şîyî warê qewimîyayîşî. Hemserekê Pêroyî yê DBPyî Keskîn Bayindir, wekîlê DEM Partî û hemşaredarî cayê şarî de pawenê. Hemşaredaranê Amedî Ayşe Serra Bucak Kuçuk û Dogan Hatun badê cigêrayîşênê warê şawatî nêweşxane de birîndarî zîyaret kerdî.

Hemserekanê Pêroyî yê DEM Partî Tulaye Hatimogullari û Tuncer Bakirhanî semedê hewnakerdişê şewatî veng da ke bi helîkopteran mudaxale bêro kerdene. Rixmê heme vengdayîşan hewa ra mudaxale nêame kerdene. Ekîbê AFADî erey ameyî.

Şewat de merdimî, hewyanî, darî vêşayî û bi hezaran ton lazut û xeleyê şarî zirar dî. Îtfaîyeyanê şaredarîyanê DEM Partî mudaxaleyê şewatî kerd. Şewat bi xo şi hewna.