Komeleya Rojnamegeran a Dîcle Firatî (DFG) û Rojnamegerê Platformê Rojnamegeran ê Cinîyan ê Mezopotamya (MKGP)  derheqê operasyonê vera rojnamegeran o ke ewro serê sibayî ame kerdene de verê banê DFGyî de eşkerayîye daye.

 Pîya bi rojnamegeranê endamanê DFG, MKGP, Sendîkaya Rojnamegeranê Tirkîya (TGS) temsîlkarê HDPyî yê Amedî zî tewrê eşkerayîye bîyî. Eşkerayîye hetê Hemsereka DFGyî Dicle Muftuoglu ra ameye wendene.

Muftuoglu vat: '' Sereştişan de xeylêk embazê ma ameyî destbendkerdene û dest nîya telefon û meteryalanê dîjîtalan ê înan ser. Buroyê Jinnewsî de Komputerî zî ameyî destsernayene. Medyaya paşgêre hukmatî destbenkerdişî sey 'Rêxistinkerdişê Komîteya Çepemenîye' serwîs kerdî. No ramojneno ke prosesêko newe yê hêrişî kewto dewre.

Embazê ma bi xeberanê ke Stêrk TV û Medya Haber TVyî de vejîyayî yenê sûcdarkerdene. Xora embezê ma xeberanê eşkerayan kenê. La wina ramojnenê ke çew vano qey embazê ma çîyo nimite kenê. Ma rojnamegerîye kenê, çîyo xelet nêkenê. Ma tîya ra reyna vajê ke ma do çirey verê polîtîkaya zext, şîdet û şerî de milê xo çewt nêkerê.''

Muftuoglu ard ziwan ke sebebo esasî yê nê destbendkerdişan oyo ke binpaykerdişê heqan ê Kurdîstanî dîyenê eşnawtine û vat: ''Îqtîdar wazeno ke polîtîkayê ci yê şerî yê leyminî wa merê zanayene. Coka metodanê winayênan şuxulneno. Prosesê hêrişê verê Rojawan û Başûrî Kurdîstanî de wazenê  vengê kurdan bibirnê. Sey leteyê qirkerdişê vera kurdan wazenê rojnamegeranê kurdan bêveng bikerê. Sey vizêr ewro zî ma do verê zextan de çok medê û raştîyan bidê eşnawitene. Ma 50 serrî yo bi eynî qerardarîye heqîqetî resnenê şarî. Ma reyna vanê ke raştîye do tarî de memanê. Genaralê Apê Mûsayî rêçê Gurbetellî Ersozan de semedê roşnkerdişê tarîtîye do nuştişê raştîyan rê dewam bikerê. Wa embezê ma cade bêrê veradayene.''

Vervatoxa  MKGPyî Roza Metina zî vat rojnamegerîye sûc nîya û veng da ke embazê înan cade bêrê veradayene.

Temsîlkarê TGSyî Mahmut Oralî zî vist vîrî ke îqtîdar çiwext kewno tenganî verî hêrişê çapemenîya kurdî keno û vat heta hewro zextanê vera rojnamegeran ra înan tiway dest nêfîna û do ewro ra tepîya zî wina bo.