Şirnex de xebatê weçînayîşî yê Partîya Çep a Keske dewam kenê. Çarçewa nê xebatan de 7ê gulane de şaristan de mîtîngêko pîl do bêro kerdene. Hemserekê KCDyî Berdan Ozturk, namzedê Partîya Çep a Keske Newroze Uysal Aslan, Mehmet Zekî Îrmez, Ayşegule Dogan û Bedirxan Osal do beşdarê mîtîngî bibê.

Temsîlkaranê partîyanê Îtîfaqê Kede û Azadîye venga her kesî da ke wa beşdarê mîtîngî bibo.

Hemvervatoxê Partîya Çep a Keske yê Şirnexî Ahmet Başakî vat: ''Xebatê ma dewam kenê; ma keye bi keye gêrenê û şarî rê vanê ke nê weçînayîşî zaf girîng ê. Çarçewa xebatanê weçînayîşî de ma 7ê gulane de mîtîngêkê pîlî zî bikerê.''

Namzed Mehmet Zekî Îrmezî vat: ''Seba serkewtişêkê pîlî ma venga şarê xo yê Botanî danê ke bêrê pîya ma meydanan de bibê. Ma pê xo bawer ê. Ma do pîya îqtîdarê AKP-MHPyî bişawê.''

Hemsereka Partîya Herêmanê Demokratîkan (DBP) a Şirnexî Ayşe Salgucak vat: ''Ma şarê xo ra pawenê ke bi coş û renganê xo beşdarê nê mîtîngî bibo.''

Îdarekara HDPyî Gurbete Aslan vat: ''Ma sey cinîyan do bi tîlîlî û coşê xo ser bikewê. Ganî cinîyî hînî nê zulmî qebul nêkerê û serkêşîya mîtîngan bikerê.''

Taybete Bîlgeya ke Heyetê Weçînayîşî yê HDPyî ra ya, ard ziwan ke ê do mîtîngê xo de rengê 14ê gulane dîyar bikerê.