Grevê vêşanîye ke semedê wedartişê tecrîdê serê Rayberê Şarê Kurdî Abdullah Ocalanî rayberîya Leya Guvene de ameyîbî destpêkerdene ra yew zî hetê 14 xoverdayoxan ra bajarê Strasbourgî yê Fransa de amebi viraştene. Şîyar Serxwebûno ke  Berlîn ra tewrê na çalakîye bibi û 17’ê Kanûn a 2018’î ra heta 26’ê Gulan a 2019’î Strasbourg de grevê vêşanîye de bi, bi vengdayîşê Ocalanî pîya bi embazanê xo çalakîya xo qedînayebî. Serxwebûn vizêr paytextê Almanya Berlîn de hetê Kurdistanijan ra bi vilikan ame pêşwazîkerdene.

Serxwebûn dima ra komel de tewrê werê fitarî bi û tîya qiseykerdişêk kerd. Serxwebûnî vist vîrî ke ê bi qerardarîya girde 161 rojî grevê vêşanîye de mendî û va: ‘’Xoverdayîşê ma ewro ra tepîya do dewam bikero. Ma Birêz Ocalan, partiye û şarê xo ra hes kenê. Ma do şehîdanê xo yê ke demê grevê vêşanîye de şehîd bîyî xo vîra nêkerê û heta peynî nê xoverdayîşî rê wayîr bivejîyê.’’

Bado zî Mele Mûstafa Tûzako ke bi 3 aktîvîstan Berlîn de grevê veşanîye de bi, ey qisey kerd. Tûzako ke tedawîya ey dewam kena û bidestûr tewrê fitarî bi ard ziwan ke dewleta Tirkî vera xoverdayîşê grevê vêşanîye de pey ser gameeştiş rê mecbur mende.