Vervatoxa Dîwanê Edabîyatî yê Rojawanî Nerîmane Evdikê derheqê xebatanê edebîyatî, zehmetîyan û edebîyatê kurdan ke pîya bi şorişî ame averberdene de ANFyî rê qisey kerd.

Nerîmane Evdikê derheqê edebîyatî de nê vatî: “Xebatê edebîyatî ya zî edebîyatê kurdan bi mîrasê verê şorişî ame averberdene. Verê şorişî nuştox û şaîrê ma bibî. Înan keda pîle daye. Vera xeylêk zehmetîyan têkoşîn kerd. Keda înan ewro verê ma akena. Pîya bi Şorişê Rojawanî şertî bedilîyayî, îmkanî ameyî afirnayene û xeylêk destkewteyî ameyî destfînayene. Nuştox û şaîrê ma yê verê şorişî musayê na rehatîye nîyê. Şuxilnayîşê nê îmkanan de zehmetîye ancenê. Seke mi vat binawanî ma est o, xeylêk nuştox, cigêrayox û şaîrê ma zî est ê û badê şorişî neslêko newe vejîya meydan. No neslo newe zî heqê nê karî ra yeno. Tîya berpirsîyarîya Dîwanê Edebîyatî pîl a. Matbaayê ma est ê, kovarê ma est ê. Festîvalê edebîyatî yenê organîzekerdene. Hinî ma rehet eşkenê eserenê kurdkî vila bikerê. Ma eşkenê kitabanê xo bişawê fûaranê teberê welatî.

Şorişo gird ame kerdene, nê şorişî pîya bi xo îmkanî afirnayî. Coka mabênê kitanbanê ewro û 20 serran cuwa verî de ferqê pîlî est ê. No şoriş miheqeq tesîrê nuştişî zî keno. Şoriş do tesîrê xo edebîyatî ser o zî bikero. Ma çîyê zaf gird û bimbarekî ciwîyenî. La çi heyf ke ma nê şorişî bi edebîyatî tam nêeşkenê bîyarê ziwan. Tîya kemastîye ma est a. Xora şorişê ma hema zaf ciwan o. Ganî ma teqizê mekerê. Wextê verê ma do edebîyato raşt ê nê şorişî vejîyo meydan. No şoriş tim raştê hêrişan yeno, dejê pîlî ciwîyenî. Seba ke heqê heme destanan û qehremanîyan bêro dayene ganî dahîna zaf kede bêro dayene û fedakarîye bêra kerdene.

Rojawan de kitabê kurdkî û erebkî vejîyenê. Erebkî îmkanê ci zafê eşkenê welatanê bînan ê eraban de zî bêrê weşanayene. La îmkanê kurdkî wina çîn o. Probleme ma yo bîn zî tîya rexnegîrê ma çîn ê. Reyna nuştoxê verênî nuştoxanê neweyan nêwanenê û nêecibîyenê. Seba ke rexnegîrê ma çîn ê. Ma çend serrî yo komîteyê wendişî nayî ro. Verî ke kitabêk bêro weşanayene nê komîteyî wanenê. Goreyê nê kitabî yenê erjnayene wina yenê weşanayene. Destpêkê şorişî de seba ke reya verênî weşanxaneyê ma yo kurdkî bibi, heme kitabê ke kewtênê destê ma pêro weşanayêne. No tewiro xelet bi û hema zî ma dejê ci ancenê. Ma rê rexnegîrê xurtî yê edebîyatî lazim ê.”