Amed de hewteyê ravîyarteyî de vera dezgehanê ziwanê kurdkî operasyon ame kerdene û 29 xebatkarê kurdkî ameyî destbendkerdene. Vera hêrişê vera kurdkî nêrazîbîyayîşî dewam kenê.

Îdarekarê Merkezê Kulturî yê Ziwan û Cigêrayîşî yê Arsisa yo ke Wan de xebetanê ziwanî rayra beno,  Şevket Acarî operasyonî sey leteyêkê polîtîkaya asîmîlasyonî name kerdî û vat ziwanê kurdkî rixmê heme hêrişan payra mend û do payra bimano.

Şevket Acarî ke derheqê babete de ANFyî rê qisey kerd nê vatî: ''Serranê peyênan de hêrişê vera kurdkî zêdîyayî.  Na polîtîkaya seserran a û dewam kena. Wazenê ke kurdkî asîmîle bikerê, çîn bikerê. Şaredarîye tabeya kurdkî daliqnenê, hêriş kenê, hêrişê konseranê kurkdî kenê. Çunke wazenê ke wa kurdkî cuye de nêro şuxilnayene û ma nê polîtîkayan şermezar kenê.

Amed de vera dezgehanê ziwanê kurdkî hêrişî ameyî kerdene, 29 embazê ma ameyî destbendkerdene. Çunke nêwazenê ma kurdkî qisey bikerê. Nêwazenê ma xebatanê kurdkî biafirnê.  Ziwanê kurdkî ziwanêko zengîn o, ziwanêkê dinya yo û se kenê  wa bikerî ê do çirey meeşkê ziwanê ma çîn bikerê. Wa nê polîtîkayan caverdê. Bîlasebeb gelç vejenê, ma do qetî ziwanê xo cameverdê û semedê ziwanê xo her çî bikerê.

Ziwanê kurdkî emanenê Melayê Cizîrî, Ehmedê Xanî û Mîr Celalettînî yo.  Ma wayîrê nê emanetî bivejîyê, ziwanê xo her roje binena aver berê. Ma bi wayîrvejîyayîşê ziwanê xo cewabê nê polîtîkayanê leyminan bidê. Ma do sey mamosteyanê dezgehanê ziwanî nê polîtîkayan betal bikerê.''