Ame de 24ê êlule de vera dezgehanê ziwan û kulturê kurdan sereştişî ameyî kerdene û 30 kesî ameyî destbendkerdene. Înan ra hemserekê MED-DERî yo verên Rifat Ronî ame tepiştene.

Tepiştişê Rifat Ronîyî verê edlîye de ame protestokerdene. Kesê ke ameyî veradayene hetê merdiman xo û temsîlkaranê rêxistinanê komelê sîvîlî, partîyan ê sîyasîyan û wekîlanê DEM Partî ra bi çapik, tîlîlî û slogananê “Bê ziman jiyan nabe” ameyî pêşwazîkerdene.

Hemvervatoxa Komîsyonê Ziwan û Kulturî ya DEM Partî Cemile Turhali ard ziwan ke hêrişê vera xebatkaranê ziwan û kulturî nînê qebulkerdene û vat: ''Nê hêrişî nêeşkenê vera xebatanê ziwanê kurdkî bigîrê. Ma xebatanê Firat Ronî yê semedê kurdkî zanê. Ma do xebatanê Firat Ronî bidomnê.''

Îdarekaranê MED-DERî ra avûkat Eyup Aydnizî vera zextanê serê ziwanê kurdkî û tepiştişê Ronî hêrsê xo ard ziwan û nê vatî: ''Ma tornê Ehmedê Xanî, Feqiye Teyranî yê. Wa her kes bizano ke embazanê ma çîyêko xelet nêkerd.  Ma têna perwerdeyê bi ziwanê kurdkî wazenê. No welatê ma yo, herra babî û pîrîkanê ma ya. Coka ma herra xo de semedê ziwanê xo têkoşîn kenê. Ma wazenê wa ziwanê kurdkî bibo ziwano fermî.Wa ziwanê ma mekteb de bibo ziwanê perwerdeyî. Mamoste Firat ame tepiştene la tîya xeylêk mamosteyî est ê. Ma do her warî bikerê warê ziwanî. Ma veng danê pêrune: Wayîrê ziwanê xo vejîyê.''

Aydenîzî vat ê do verê MED DERî de vera zeztan eşkerayîye bidê. Eşkerayîye bi slogananê sey “Bê ziman jiyan nabe” û “Zimane me rumeta me ye” qedîyaye.